Industria produkzioa %0,4 jaitsi da irailean EAEn

BILBO 6 (EUROPA PRESS)

Euskal Autonomia Erkidegoko (EAE) industria produkzioa %0,4 jaitsi da irailean aurreko urteko hil beraren aldean, lan egutegiko baldintza homogeneoetan. Aurreko hilaren aldean, berriz, industria jarduera %1,7 gehitu da, urtaroari dagozkion ondorioak zuzendu ondoren, Eustat euskal estatistika erakundearen datuen arabera.

Ondasunen helburu ekonomikoaren arabera, kontsumo ondasunetako produkzioak urte arteko bilakaera negatiboa izan du irailean, %1,1 jaitsi baita; ekipo ondasunen produkzioa %4,2 igo da aurreko urteko irailaren aldean, bitarteko ondasunena %1,8 jaitsi da, eta energiaren produkzioak %8,7ko atzerakada izan du.

Lurraldeka, industria produkzioaren indizearen urte arteko bilakaera positiboa izan da irailean Gipuzkoan, jarduera %2,6 hazi baita; Araban eta Bizkaian, aldiz, industria produkzioak behera egin du, %2,2 eta %2,3, hurrenez hurren.

Maila bereiziagoan, EAEko industrian pisu handiena duten sektoreen artean, energia elektrikoa, gasa eta lurruna (-%9,8) eta kautxu eta plastikoak (-%5,3) izan dira irailean produkzioaren jaitsiera handiena izan duten sektoreak, urte artean. Aitzitik, urte arteko hazkunderik handienak elikagaien, edarien eta tabakoaren industrian (%5,7) eta makineria eta ekipoan (%4,8) izan dira.

Bestalde, industria produkzioaren indizea %0,2 jaitsi da EAEn 2024ko lehen bederatzi hilabeteetan. Irailera arte metatutako produkzioa %1,9 jaitsi da kontsumo ondasunetan, %1,4 bitarteko ondasunetan eta %0,8 energian, eta %3,2 igo da ekipo ondasunetan.

Lurraldeka, 2024ko lehenengo bederatzi hilabeteetako metatua balantze negatiboarekin itxi da Araban eta Bizkaian, industria produkzioa %1,8 eta %1,5 jaitsi baita, hurrenez hurren; Gipuzkoan, aldiz, produkzioa %2,0 hazi da, aurreko urteko aldi metatu beraren aldean.