Iruñeko Udalak bat egin du Euskaraldiarekin eta lankidetza hitzarmena sinatu du Tauparekin

BILBO, 10 (EUROPA PRESS)

Iruñeko Udalak bat egin du maiatzaren 15etik 25era bitartean egingo den Euskaraldia ariketa sozialaren laugarren edizioarekin, hirian euskararen erabilera sustatzeko asmoz, eta lankidetza hitzarmena sinatu du Taupa Euskaltzaleen Mugimenduarekin, Iruñeko Udaletik jakinarazi dutenez.

Ildo horetan, Joseba Asiron Saez Iruñeko alkateak eta Aitziber Campion Ganboa Herritarren Partaidetzako eta Euskarako zinegotzi bereziak bilera egin dute ostegun honetan Oskar Zapata Solano Taupa Euskaltzaleen Mugimenduko Nafarroako ordezkaritzako zuzendariarekin eta Nora Gonzalez Goñi Euskaraldiaren Nafarroako zuzendariarekin. Euskara bultzatzeko egitasmoa izan dute hizpide bileran.

Horrela, Iruñeko Udalak babesa eman dio egitasmoari eta, hitzamenaren baitan, 7.000 euroko laguntza emango dio. Hitzarmenean zehaztu dute helburua dela Iruñeko auzoetan herritarren taldeak sortu, kudeatu eta dinamizatzea herritarren parte hartzea sustatu eta dinamikak antolatzeko, hala Euskaraldia hasi aurretik, nola egitasmoak iraun bitartean.

Taupa Euskaltzaleen Mugimendua izango da onuraduna, eta konpromisoa hartu du egitasmoa sustatzeko bertako komunikabide txikietan eta handiagoetan, eta Iruñeko Udalarengandik jasotako finantzaketaren berri emateko.