Karbonoan neutroa den hiri bihurtzeko Gasteizen bideratzen ari diren ekintzak azalduko ditu Etxebarriak Valentzian

GASTEIZ, 24 (EUROPA PRESS)

Maider Etxebarria Gasteizko alkatea Valentziara joango da aste honetan, 2030 Agendako helburuekin bat eginda Arabako hiriburua karbonoan neutroa den hiri bihurtzeko bideratzen ari diren ekintzak azaltzera.

Jasangarritasunaren aldeko Tokiko Gobernuen Sareak antolatuta asteartean hasiko den Valencia Cities Climate Week asteko hainbat ekitalditan izango da Gasteizko alkatea.

"Bere garaian ingurumen arloan hiri aitzindaria izan ginen. Oraingoan, gure esperientzia partekatzeko eta egiteko beste modu batzuetatik ikasteko unea da, deskarbonizazioaren helburu komuna lortzeko", adierazi du Etxebarriak.

Horrela, asteartean, ekainaren 25ean, Gasteizko alkatea Hirien Misioaren Konferentziaren irekiera ekitaldian izango da, eta bilerak izango ditu Espainiako eta Europako hainbat agintarirekin, klima aldaketarekin eta jasangarritasunarekin lotutako alderdiak lantzeko.

Asteazkenean, hilaren 26an, Etxebarriak Hiri Erresilientziari buruzko Europako Biltzarraren irekiera ekitaldian eta bi topaketatan parte hartuko du: alde batetik, 'Maila anitzeko gobernantza' panelean izango da, eta Europako hirietako alkateekin hitz egingo du klima aldaketaren aurkako borrokan tokiko gobernuek mundu mailako erabakietan parte hartzeak duen garrantziaren inguruan; bestetik, deskarbonizazioa lortzeko Hirien Misioaren Konferentziako udalerrietan egindako jarduerak azaltzeko mahai-inguruan esku hartuko du.

Gasteizko alkatea Jasangarritasunaren aldeko Tokiko Gobernuen Sareko Europako Eskualde Mailako Batzorde Eragileko zuzendaritzako kidea izango da 2024 eta 2027 artean. Erakundea Europako 13 hirik osatzen dute, garrantzi handia du nazioartean, eta NBErekin eta Europako beste erakunde batzuekin lan egiten du jasangarritausnarekin lotutako hainbat jarduera bultzatzeko.