Landa ostatuen sarrerak %26,8 eta apartamentu turistikoenak %2,8 jaitsi dira martxoan EAEn

BILBO, 25 (EUROPA PRESS)

Euskal Autonomia Erkidegoko (EAE) landa ostatuetan martxoan izandako bidaiarien sarrerak %26,8 jaitsi dira iazko hilabete beraren aldean, eta apartamentu turistikoetan izandakoak %2,8, Aste Santuko egutegiaren ondorioz, Eustat euskal estatistika erakundearen arabera.

Hain zuzen ere, kontuan izan behar da aurtengo martxoarekin alderatu den 2024ko martxoan Aste Santua ospatu zela, eta aurten, berriz, Aste Santua apirilean izan dela.

Horrela, EAEko landa ostatuek 8.927 sarrera erregistratu dituzte martxoan, eta ostatu gauak 19.851 izan dira, aurreko urtean baino %36,8 gutxiago.

Martxoan EAEko landa ostatuetan erregistratutako sarreren %85,6 Espainiako Estatuko bisitarienak izan dira, eta %27,1eko beherakada gertatu da aurreko urteko hilabete berarekin alderatuta. Gainera, martxoan erregistratuta gaualdien %85,1 Espainiako Estatuko bisitarienak izan dira.

Lurraldeka, sarreren kopuruaren urtetik urterako beherakada %45,1ekoa izan da Arabako landa ostatuetan, %48,7koa Bizkaikoetan eta %6,5ekoa Gipuzkoakoetan. Ostatu gauen kopuruek ere behera egin dute aurreko urteko martxoarekin alderatuta: %57,2 Bizkaian, %47,7 Araban eta %21,4 Gipuzkoan.

EAEko landa ostatuen batez besteko egonaldia 2,22 egunekoa izan da martxoan, hau da, 2024ko hilabete berekoa baino txikiagoa (2,58 egunekoa izan zen orduan). Batez besteko egonaldiak ez du adierazten EAEra datozen bidaiarien egonaldiaren guztizko iraupena, gaua igarotzen duten establezimendu bakoitzean batez beste ematen duten egun kopurua baizik.

Plazen araberako okupazio mailak %8,1 puntuko jaitsiera izan du urtetik urtera EAEn, eta %17,0ra iritsi da. Gelen arabera neurtuta, berriz, %8,5 puntuko jaitsiera izan da urtetik urtera, eta %20,8ra iritsi da.

Bestalde, apartamentu turistikoei dagokienez, 2025eko martxoan 15.277 sarrera eta 53.895 ostatu gau erregistratu dira EAEn, hau da, 2024ko martxoan baino %2,8 eta %0,5 gutxiago, hurrenez hurren.

Apartamentu turistikoetan martxoan izandako sarrera guztien %71,4 eta ostatu gau guztien %66,3 Estatu espainiarreko bisitarienak izan dira, eta urte arteko %6,6ko eta %4,3ko jaitsierak izan dituzte, hurrenez hurren.

Orobat, apartamentu turistikoetako batez besteko egonaldia 3,53 egunekoa izan da martxoan EAEn, hots, 2024ko martxoan izandakoa baino handixeagoa, 3,45 egunekoa izan baitzen iaz.

Plazen arabera, okupazio maila % 31,3ra iritsi da EAEn, eta, beraz, 2024ko martxokoa baino %5,1 puntu txikiagoa izan da. Apartamentuen arabera, berriz, okupazio mailak %4,7 puntuko jaitsiera izan du, eta %59,2ra iritsi da.

Azkenik, aterpetxe turistikoei dagokienez, 15.608 sarrera eta 29.096 ostatu gau erregistratu dituzte, hau da, aurreko urteko martxoan baino %15,1 eta %10,7 gutxiago, hurrenez hurren.