BILBO, 29 (EUROPA PRESS)
Athletic Clubek eta Maite Zubietak akordioa erdietsi dute 19 urteko futbolariaren kontratua bi denboraldiz luzatzeko, 2025eko ekainaren 30era bitarte, talde zuri-gorriak jakitera eman duenez.
Erdilari busturiarra 2018-2019ko denboraldian iritsi zen Lezamara kadete mailan jokatzeko eta denboraldi honetan jokatu ditu lehen minutuak talde nagusiarekin. Datorren denboraldian lehen taldearen dinamikan sartuko da osotasunean.
Zubieta atzelari zein erdilari gisa aritu daiteke, eta "ezinbesteko jokalaria" izan da emakumezkoen filialaren hazkundean klubera iritsi zenetik eta joan den abenduaren 3an lehoi bezala debuta egin zuen Lezaman Madril CFFren aurka.
Denboraldi honetan, 1. RFEF mailan 14 partida jokatu ditu eta Iraia Iturregiren agindupean F Ligan 16 neurketa eta Kopako bi norgehiagotan lehiatu da. Gainera, urrezko bi domin lortu zituen Espainiako selekzioarekin joan den udan, 19 urtez azpiko Europako Txapelketan eta 20 urtez azpiko Munduko Txapelketan.
Akordioa sinatzeko Ibaigane jauregian egindako ekitaldian, Jon Uriarte presidentea eta Xabi Arrieta emakumezkoen taldeen kirol zuzendaria izan ditu lagun Zubietak. Esan duenez, "Athletic Clubeko lehen taldean jokatzea eta Lehen Mailan debuta egitea beti izan da nire ametsa".
Busturiako jokalariak ilusio handia agertu du hasteke dagoen denboraldi berriarekin, eta lehoi moduan "esperientzia eta minutu gehiago" eskuratu nahi ditu.
Andalucía
