Miren Arzalluz izango da Guggenheim Bilbao Museoaren zuzendari nagusi berria

BILBO, 12 (EUROPA PRESS)

Guggenheim Bilbao Museoaren Patronatuak Miren Arzalluz historialari eta komisario ezaguna izendatu du museoaren zuzendari zagusi astearte honetan, azken hilabeteotan egin den hautaketa prozesua burutu ondoren, eta 2025ko apirilaren 1etik aurrera hartuko du kargua.

Museoko iturriek jakinarazi dutenez, Arzalluz aukeratzeko arrazoien artean daude nazioarteko kultur-erakundeetan duen esperientzia eta horri esker lortu duen aintzatespena, museoaren proiektuarekin epe luzerako konpromisoa hartzeko borondatea, museoa herrialdea eraldatzeko estrategian giltzarria izateko helburuarekin bat etortzea, eta museoak lan egiten duen testuinguru kulturalekiko sentsibilitatea erakustea, tokiko balioak eta balio globalak integratzeko gaitasuna baliatuta.

Miren Arzalluz Loroño (Bilbo, 1978) Palais Galliera-Parisko Modaren Museoaren zuzendaria da gaur egun, eta kulturaren arloan nazioarteko ospea duten erakundeetan erantzukizun handiko lanetan osatu duen ibilbidearen ondoren helduko da Bilboko Guggenheim museora. Artearen historiaren, ikerketaren eta museoen arloetan duen "ezagutza sakona" dakar, eta, horrez gain, "eskarmentu handia" du erakundeen kudeaketan eta nazioarteko harremanetan.

Deustuko Unibertsitateko doktoregoa du Historian, Artearen Historiako Masterra egin zuen The Courtauld Institute of Art erakundean eta Politika Konparatuan Masterra London School of Economics erakundean.

Azken sei urteotan Palais Galliera museoaren zuzendaria izan da eta erakundea berritzeko eta handitzeko proiektu handinahi baten ardura izan du, museoaren birdefinizio sakon eta berritzaile baten bidez erakunde hori fase berri baterantz eramatea lortuz. Paris Musées eta hiriko erakundeekin lankidetzan, Arzalluzek diziplinarteko ikuspegi berria sustatu du, Palais Galliera-ren eta nazioarteko beste arte eta diseinu museo batzuen arteko elkarrizketak eta kolaborazioak ezarriz eta publikoaren nahiz kritikaren aldetik onarpen handia izan duten erakusketak sortuz.

Arzalluzek nazioartean lortutako beste aintzatespenen artean, Frantziako Kultura Ministerioak Chevalière de l'Ordre des Arts et des Lettres izendatu du aurten, eta berriki Amerikako Estatu Batuetako diseinu sari nazionaletan epaimahai izendatu dute, New Yorkeko Smithsonian erakundeko Cooper Hewitt Diseinu Museoak ematen dituen National Design Awards 2025eko sarietarako.

EUSKAL KULTURA

Guggenheim Bilbao Museoaren arabera, Miren Arzalluzek "lotura hestuak" ditu gaur egungo euskal kulturarekin ere: Bilboko Arte Ederren Museoaren Aholku Batzorde Artistikoaren kidea da, eta Parisera joan aurretik Etxepare Euskal Institutuaren zuzendaria izan zen.

Arte aditu independente gisa izan duen esperientziari esker, erakusketen komisario izan da munduko hainbat herrialdetan, eta bost urtez Balenciaga Fundazioaren eta Museoaren komisario buru izan zen, erakusketen eta bildumaren arduradun.

Miren Arzalluz zuzendari nagusi hautetsiaren izendapenak 2025eko martxoaren 1etik aurrera izango du eragina. Lau astez, apirilaren 1era arte, murgiltze prozesu bat egingo du Bilboko eta New Yorkeko Guggenheim museoetan, Juan Ignacio Vidarte Bilboko museoko egungo zuzendari nagusiarekin batera, eta egun horretan hartuko du kargua, erantzukizun osoz.