Seth Troxler, Txef_A eta Block2Club, maiatzeko Art After Dark saioan

BILBO, 17 (EUROPA PRESS)

   Seth Troxler estatubatuarra, Txef_A eta Block2Club izango dira maiatzaren 8ko Art After Dark saioko protagonistak Guggenheim Bilbao Museoan, gaueko 22:00etatik aurrera, Atrioan, museo bilbotarrak prentsa ohar bidez jakinarazi duenez.

   Saioa Block2Club DJ taldeak hasiko du. Dave Onek eta AR-Loisek hamarkada bat baino gehiago daramate DJ moduan lanean, Almah Mater taldeko kide gisa. Musika gustu antzekoa dutenez, Block2Club sortu zuten, Dave One Bilboko Fever klubaren Bullshit Bilbao Club lantaldean sartu ondoren.

   Haien saioetan azken arrakastez eta trap music, EDM eta dubstep doinuen nahasketez goza daiteke. Block2Club nazioarteko artista handien ondoan izan da agertokian, tartean, The Zombie Kids, Feed Me, Danny Ávila, DJ Jekey, The Warriors eta askoz gehiago.

   Ondoren, 23:00etan, Guggenheim Museoko Atriora itzuliko da El_Txef_A -Aitor Etxebarria-. Diskoak argitaratu ditu etxe askotan, hala nola Permanent Vacation, Mule electrónic, Hypercolour eta Fiakunen, berak sortutako diskoetxea. Iraupen luzeko bi disko kaleratu ditu, "Slow Dancing In A Burning Room" (2012) eta "We Walked Home Together" (2014).

   Sónar jaialdian parte hartu du eta Berlinen, Rio de Janerion, Londresen, New Yorken, Chicagon, Moskun, Vienan eta Mexiko Hirian ipini du musika. Azken urteotan Europatik zein Ameriketatik jartzen du musika astero eta, gaztea den arren, jadanik underground giroko klub handietan lan egin du, esaterako, Watergate (Berlin), Verboten (New York), Spybar (Chicago) eta Module (Tokio) aretoetan.

SETH TROXLER

   Azkenik, 00:00etan Seth Troxler estatubatuarraren txanda izango da. Michiganeko DJ honen lana techno house doinuak ditu oinarri. DJ lanetan hasi zen Detroiten 16 urte zituela, The Works klubean; hiri horretan ere 'Melodies and Memories' disko denda entzutetsuan lan egin zuen, eta arin ikasi zituen musika elektronikoaren historiaren nondik norakoak.

   Eragin dioten artisten artean Richie Hawtin eta Moodymann daude. 2009 eta 2012 artean The Resident Advisor Top 100 DJ zerrendan hirugarren, bigarren eta lehen postua lortu zituen, hurrenez hurren, eta harrezkero ibilbide geldiezina darama: urtean 158 saio egin izan ditu, eta izen handiko lokaletan jarri du musika: Fabric (Londres), Panorama Bar eta Watergate (Berlín), Womb (Tokio), Tenax (Florentzia), Robert Johnson (Frankfurt), The Rex (Paris), Avalon (Los Angeles) eta The End Up (San Fransisco).

   Berlingo Der Visionäre klub mitikoko DJ egoiliarra da, eta Detroiten, Ryan Crosson eta Lee Curtissekin batera, Tesh Club festak antolatzen ditu. Estudioan izen handiekin lankidetzan izan da, adibidez, Matthew Dear, Art Department, Tiefschwarz, Deetron, Masemenos eta dOP. Visionquest diskoetxea sortu zuen, bai eta Tuskegee, Soft Touch eta Play It, Say It ere. Horrez gain, Londresko Smokey Tails jatetxearen jabe da.

   Maiatzaren 8ko gauean, 22:00etatik 01:00era Guggenheim Bilbao Museora bertaratzen direnek, "Niki de Saint Phalle" erakusketaz, Kimsooja artista korearraren "Hariaren ibilbideak" bideoinstalazioaz eta "Gure garaiko artea: Guggenheim Bildumen maisulanak" erakusketaz gozatzeko aukera izango dute.

   Sarrera (18 urtetik gorakoentzat) 13 euro da publiko orokorrarentzat eta 9 euro Museoaren Lagunentzat. Ikusle kopuru mugatua, eta sarrerak txarteldegian eta www.guggenheim-bibao.es.webgunean salgai daude.