GASTEIZ, 16 Sep. (EUROPA PRESS) -
Tuvisa Gasteizko garraio operadore publikoak langileekin adostutako hobekuntzak jarri ditu martxan 1, 3, 5, 6, 7 eta 9 autobus lineetan astelehen honetan, irailaren 16an. Aldaketa horietako batzuek, gainera, tranbia Salburura hedatu zutenetik garraio publikoko lineen diseinu berria aztertzen hasi zirenetik herritarrek egindako ekarpenei ere erantzungo diete. Aldaketa horiek jasoko dituzten lineetan pilatzen da hiriko autobus sareko erabiltzaileen %40 baino gehiago.
Iñaki Gurtubai Tuvisako presidenteak azaldu duenez, "Tuvisak bere linea horien zati handi bat aldatuko du datorren astetik aurrera zerbitzu hobea emateko, bereziki auzo berriei. Hainbat tokitan ibilbideak zabaldu, geraleku berriak sortu eta maiztasunak hobetuko dira. Hori guztia, gainera, langileekin adostuta eta herritarrek egindako ekarpenei arreta emanda egin dugu".
Horrela, azken hilabeteotan, hainbat markesinaren tokia aldatu da, geraleku berrietan gidarientzako komunen birkokapena kontratatu da eta Tuvisaren sareak behar bezala funtzionatzen duela erregulatzeko sisteman beharrezko aldaketa informatikoak gehitu dira.
Bada, lan horiek amaituta, hainbat aldaketa aplikatuko dira astelehen honetatik aurrera Tuvisaren 1, 3, 5, 6, 7 eta 9 autobus lineetan. Hain zuzen, 1. linean (Zirkularra) ordutegi berriak izango dira larunbatetan, amaierako geltokietako irteerak puntualagoak izateko.
3. linean (Betoñu-Goikolarra) eta 9. linean (Gamarra-Goikolarra), maiztasun handiagoa izango da Goikolarran, eta zerbitzua areagotuko da, egungo eta etorkizuneko auzoaren hazkundeari erantzuteko. Horretarako, 3. eta 9. lineetako autobusen koordinazioa aldatuko da, auzo berrira bidaia gehiago iristeko eta ibilbidean Asparrena kalea barne hartzeko. Maiztasuna, gaur egun, 20 minutukoa da lanegunetan, eta aurrerantzean 10 minutukoa izango da.
ARELEGI
Gainera, Arelegi auzo elkartearen eskaerari erantzunez, linean izenak aldatuko dira Goikolarra auzo sortu berria barne hartu dadin. Hala, 3. linea, orain arte Betoñu-Zumakadi izenekoa, Betoñu-Goikolarra deituko da, eta 9. linea, orain arte Gamarra-Zumakadi izenekoa, Gamarra-Goikolarra deituko da.
Era berean, Duranan dauden bi geltokiak bateratuko dira, 9. linean abiadura komertziala areagotzeko, eta laster geltoki berri bat jarriko da Bustaldea kalearen bidegurutzean, handitzen ari den Goikolarrako eremuari zerbitzu hobea emateko.
Bestalde, 5. linean (Salburua-Elejalde), orain arte Brusela hiribidea / Elorriagako atea geltokian zegoen linearen ekialdeko muturra luzatuko da Arkaiatetik ibilbidea osatu arte, Gabriel Martinez Aragon kalean. Hala, igotzeko eta jaisteko bi geltoki berri sortuko dira Brusela hiribidea eta Elorriagako kontzejuaren eremu urbanizatua lotzen dituen bidearen parean.
Halaber, 6. linean (Zabalgana-Arkaiate), aurki geltoki berria jarriko da Madril kaletik Done Jakue hiribiderako igoeran (erdialderako norabidean).
Azkenik, 7. lineak (Borinbizkarra-Salburua) ibilbide berria izango du Bake kalera arte. Linearen zati bat tranbiaren egungo ibilbidearekin bat zetorren, Salburuko bulebarrean, eta hori saihesteko ibilbidea aldatu da. Hala, linea hori Bake kalera iritsi eta bertan hasiko du ibilbidea Posta eta Olagibel kaleen arteko geltoki berri batean, eta horrela, zerbitzu hobea eskainiko du Santiago Ospitalearen eta El Corte Ingles merkataritza gunearen inguruan.
Andalucía
