UEMA 90 udal izatera helduko da larunbatean eta 30 urteko ibilbidea gogoratuko du Amasa-Villabonan

DONOSTIA, 26 (EUROPA PRESS)

UEMA Udalerri Euskaldunen Mankomunitateak ohiko batzar nagusia egingo du larunbatean, maiatzaren 29an, Amasa-Villabonan (Gipuzkoa), eta batzarkideek udalen eskaera berriek onartzen dituztenean, 90 herri izatera helduko da. Gainera, bilkuraren ondoren, 30 urteko ibilbidea gogoratzeko ekitaldia egingo du.

UEMAk jakinarazi duenez, larunbateko topaketan, Amasa-Villabona eta Zizurkil gehituko dira mankomunitatera, bi udalek osoko bilkuretan hartutako erabakiaren ondotik, eta horrela, inoiz baino udal gehiago izango dira UEMAko kide: 90. Guztien artean, 266.000 biztanleko lurgune euskalduna osatzen dute.

Batzar nagusia amaitu ondoren, UEMAren 30. urteurrena gogoratzeko ekitaldi instituzionala egingo dute Amasa-Villabonako Gurea antzokian, 11:30ean, 'UEMA: 30 urte, 90 herri... bidea zabaltzen' izenburupean. Bertan izango dira euskalgintzako, erakunde publikoetako eta Euskal Herriko alderdi, sindikatu eta askotariko alorretako ordezkariak.

Ekitaldian, UEMAren hastapenak eta ibilbidea gogoratzeaz gain, azken urteotako ildoak eta aurrera begirakoak ere izango ditu hizpide UEMAko lehendakari Iraitz Lazkanok.

Ekitaldian hitza hartuko dutenen artean, Miren Dobaran Eusko Jaurlaritzako Hizkuntza Politikarako sailburuordea, Mikel Arregi Nafarroako Gobernuko Euskarabidea Euskararen Nafar Institutuko zuzendaria eta Paul Bilbao Kontseiluko idazkari nagusia izango dira. Musikariek eta Oinkari dantza taldeko kideek ere hartuko dute parte ekitaldian.