Abanca doa un millón de euros ás vítimas da DANA

SANTIAGO DE COMPOSTELA 1 Nov. (EUROPA PRESS) -

Abanca realizou unha doazón dun millón de euros para as vítimas da DANA que arrasou a Comunidade Valenciana, co obxectivo é axudar ás numerosas persoas que atravesan unha situación crítica e que necesitan a colaboración de todos para paliar os efectos da catástrofe. A doazón será distribuída entre Cruz Vermella Española e Cáritas Española.

A maiores, Abanca activou unha conta solidaria para todas aquelas persoas ou entidades que queiran facer donativos: ES80 2080 7208 3385 3000 7122.

A doazón económica realizada este venres únese ao resto de medidas adoptadas desde o primeiro momento, como a prioridade na atención dos sinistros, unha liña de financiamento con condicións preferentes e un labor de apoio sobre o terreo a clientes, empresas e persoas damnificadas para ofrecerlles a axuda que necesiten.

Desde Abanca Seguros continúase dando prioridade aos sinistros ocasionados polos danos causados e habilitouse unha liña de atención telefónica 900 815140 para que todas as persoas poidan ser atendidas o máis axiña posible. Ademais, a entidade financeira ten activa unha liña de financiamento de até 150 millóns para atender a clientes e empresas polos danos ocasionados, especialmente no sector agro da Comunidade Valenciana, Murcia e Andalucía oriental.

Finalmente, Abanca ten outra liña de axuda aberta, a través do programa solidario 'Cultura por alimentos' da súa Obra Social. Trátase dunha liña de doazón mentres resulte necesario de toda a recadación en produtos non perecedoiros aos bancos de alimentos das zonas prexudicadas e para quen se atopen en situación de maior vulnerabilidade.