Afundación presenta 'Simultánea, o catálogo', que reproduce as obras da exposición homónima polo seu 10º aniversario

VIGO 22 Oct. (EUROPA PRESS) -

Afundación, a Obra Social Abanca, presentou este martes 'Simultánea, o catálogo', que reproduce as 359 obras da exposición homónima relacionadas entre si a través de "fíos temáticos" que as conectan unhas coas outras.

Foi a biblioteca do Teatro Afundación de Vigo o lugar elixido para dar a coñecer esta publicación, que complementa a macroexposición 'Simultánea', un proxecto presente nas súas sete sedes situadas nas grandes cidades galegas para celebrar o décimo aniversario da organización. Ao acto acudiron decenas de artistas e representantes do mundo cultural e empresarial galego.

Foron o presidente de Afundación, Miguel Ángel Escotet, e a comisaria da mostra e responsable da colección de arte Afundación, Paloma Vela, os encargados de dar a coñecer o catálogo, que dispón de 584 páxinas onde se mostran as obras e estudos analíticos de sete voces expertas na historia da arte, ademais de textos institucionais e introductorios dos propios Escotet e Vela.

Precisamente o presidente da Obra Social Abanca destacou o valor da arte como "gran ferramenta de convivencia e cohesión social", ao ser un "motor estético e creador de beleza".

Tamén subliñou a importancia do libro 'Simultánea', como resultado dun traballo coordinado e de tempo de profesionais de Afundación que, man a man, con técnicos doutras empresas colaboradoras, traballaron por responder ás "esixentes demandas da sociedade galega".

"A colección de arte Afundación, a través de 'Simultánea', (...) narra a historia de Galicia vista desde dentro e desde fóra das súas fronteiras", subliñou, para parafrasear despois a Robert Schumann, indicando que "o deber dun artista é enviar luz sobre o corazón do home". "Eu desexaría que 'Simultánea', na súa vertente artística e poética, sexa ese feixe de luz que alcance os seus corazóns", sentenciou.

Pola súa banda, Paloma Vela reivindicou que a publicación presentada este martes en Vigo recolle o "mesmo espírito" das exposicións das que nace, organizándose en sete lecturas distintas, cada unha nun capítulo, que á súa vez está dividido en distintas seccións.

"Cando empezamos a traballar coas distintas exposicións, descubrimos que había certas pezas que parecían estar conectadas por un pequeno fío temático, non evidente na maior parte dos casos e desde logo non buscado por parte dos artistas. Pero que estaba aí e que permitían establecer relacións que achegasen ao visitante e ao lector un marco de relación diferente á tradicional lectura cronolóxica", explicou a comisaria.

Como exemplo, puxo o "diálogo sorprendente" que existe entre o óleo de 1916 'O amor e as súas penas' de Jesús Corredoira e 'Noaia', de Xaime Quessada, que comparten a narración da mesma "estraña situación", entre outras moitas obras.

'SIMULTÁNEA, O CATÁLOGO'

Simultánea é unha obra en cartoné de gran formato, de 584 páxinas, con imaxes das 359 obras expostas na mostra 'Simultánea' e que conta cos textos analíticos de sete recoñecidos nomes da historia de arte que abordan, nos seus respectivos capítulos, as sete mostras.

En concreto, José Manuel García Iglesias céntrase en 'Retratos'; Asunta Rodríguez estuda a 'Vanitas' do obxecto contemporáneo e doméstico; Carlos L. Bernárdez describe os 'Fluxos e refluxos. A presenza do mar na arte galega'; Federico L. Silvestre trata o 'Espazo aberto e natureza'; Miguel Ángel Cajigal, El Barroquista, destaca a 'Abstracción. O impacto que o cambiou todo'; Mercedes Rozas aborda as 'Arquitecturas vividas'; e Pilar Corredoira opta por 'Voar coa imaxinación'.

O libro ten un prezo de 75 euros, aplicable durante o período expositivo, sendo parcialmente subvencionado por Afundación.

Pola súa banda, a exposición 'Simultánea', aberta o pasado 9 de outubro, realiza unha mirada en clave galega da arte dos últimos 200 anos a través de máis de 350 obras para celebrar o décimo aniversario da Obra Social de Abanca. Estará aberta até o 25 de xaneiro nas sete grandes cidades galegas, cunha temática distinta en cada sede.