Alumnos dos centros educativos do Morrazo danados polo temporal volven o luns a clase, algúns noutros centros

VIGO 20 Mar. (EUROPA PRESS) -

Os alumnos da Escola Infantil do Con en Moaña, e dos Institutos de Educación Secundaria de Rodeira e María Soliño de Cangas, todos na comarca do Morrazo, retomarán as clases o vindeiro luns após suspenderse nas últimas horas debido aos danos rexistrados polo temporal neses centros, aínda que os estudantes de dous deles volverán á actividade noutros centros diferentes de forma provisional.

Segundo informou a Consellería de Educación, Ciencia, Universidades e FP, na provincia de Pontevedra estes foron os centros que resultaron con danos debido ás condicións meteorolóxicas adversas, o tres con desprendementos na cuberta.

A Unidade Técnica da Consellería está a traballar "desde o primeiro momento" con empresas para acometer os labores de reparación "canto antes", segundo indicaron fontes do departamento autonómico. Ademais, o director territorial da Consellería, César Pérez, reuniuse este xoves cos equipos directivos dos centros e coas autoridades locais; e este venres o conselleiro desprazarase á zona.

No caso da EEI do Con, os 32 alumnos retomarán as clases o luns nas instalacións do CEIP de Quintela de Moaña. En Cangas, o centro máis afectado é o IES María Soliño, que polo momento non pode retomar as clases, e priorizaranse os arranxos neste instituto para reducir o impacto no alumnado; mentres, os 580 alumnos volverán o luns a clases, no IES de Rodeira, en quenda de tarde.

En canto aos alumnos do IES de Rodeira, poderán retomar a actividade o luns con normalidade, para o que se intensificarán os traballos de reparación esta fin de semana.

Os equipos directivos dos centros transmitirán as decisións tomadas ás familias polas canles habituais. Paralelamente, a xefatura territorial está a coordinar co departamento autonómico de Mobilidade a planificación dos horarios de transporte escolar, para garantir o servizo a todos os alumnos afectados.