As demandas de ruptura matrimonial aumentan un 3,3% en Galicia

Así o recolle o último informe do Consello Xeral do Poder Xudicial (CGPJ) con datos de 2024

A CORUÑA, 17 (EUROPA PRESS)

O número de demandas de ruptura matrimonial (nulidades, separacións e divorcios) presentadas en Galicia en 2024 foi de 5.269, un 3,3 % máis que as que se rexistraron en 2023, un total de 5.103.

En canto ao número de solicitudes por cada 100.000 habitantes, contabilizáronse na comunidade, no período estudado, 195,2, fronte ás 199 de media estatal.

Segundo informa o Tribunal Superior de Xustiza de Galicia (TSXG), en base aos datos feitos públicos pola Sección de Estatística do Consello Xeral do Poder Xudicial (CGPJ), en Galicia aumentaron os divorcios consensuados (de 2.912 a 2.973, un 2,1 %) e o non consensuados (de 2.068 a 2.151, un 4 %).

Pola súa banda, en relación coas separacións consensuadas, contabilizáronse 100 en 2024, fronte ás 80 do ano anterior, mentres que das non consensuadas rexistráronse 43, fronte ás 32 do 2022. Tamén se interpuxeron dúas peticións de nulidade matrimonial.

Así mesmo, en 2024 iniciáronse 763 procedementos de modificación de medidas consensuadas, fronte ás 689 do ano anterior. As demandas de modificación de medidas non consensuadas pasaron de 1.746 a 1.741, un 0,3 % menos.

En canto aos procedementos de garda, custodia e alimentos de fillos menores non matrimoniais, rexistráronse 1.336 demandas de modificación de medidas non consensuadas, fronte ás 1.302 de 2023, o que supón un aumento do 2,6%.

Ademais, contabilizáronse 763 demandas de modificación de medidas consensuadas (689 o ano anterior), o que representa unha subida interanual do 10,7 por cento.