As reformas dos hospitais galegos, protagonistas das partidas dos Orzamentos para as grandes cidades

   A promoción de vivenda pública é o outro gran foco de atención das partidas locais

   SANTIAGO DE COMPOSTELA, 19 Oct. (EUROPA PRESS) -

   As reformas dos principais hospitais galegos protagonizan boa parte das partidas dos Orzamentos de 2025 da Xunta de Galicia para as grandes cidades da Comunidade como A Coruña, Pontevedra, Ourense e Ferrol, entre outras.

    Máis concretamente, e segundo o comunicado do PPdeG da Coruña, as obras do Novo Chuac levan 37,6 millóns de euros. Ademais, o orzamento recolle partidas plurianuais por 407 millóns de euros. "Rueda blinda a atención sanitaria para os próximos 50 anos co maior investimento da Xunta na historia da cidade", destaca o portavoz do Grupo municipal Popular, Miguel Lorenzo.

   Tamén se destinarán 15,3 millóns de euros para vivenda en Xuxán, onde constrúen 144 sociais, 256 protexidas en parcelas cedidas pola Xunta e tramítase a modificación da PXOM para 520 máis. Outros 16,6 millóns de euros serán para a estación intermodal.

FERROL, "CIDADE DO DEPORTE"

   O mesmo esquema segue a cidade de Ferrol, que recibirá 5,21 millóns de euros para a construción de vivenda de promoción pública no Bertón.

    Prevese tamén a continuación da execución do Plan director do CHUF "para dotar aos ferroláns e aos veciños da comarca dunha infraestrutura hospitalaria renovada e modernizada". A Fase 1 do Plan director conta cun investimento de 15,57 millóns de euros, xa en curso, e destacan que se está traballando no proxecto da fase final.

    Outro proxecto que se inclúe é 'Abrir Ferrol ao mar' con 1,6 millóns de euros para 2025, unha actuación cuxo obxectivo é "implantar un modelo de mobilidade sustentable na zona perimetral de contacto da cidade co mar". A esta partida hai que engadir outros 600.000 euros para terminar a fachada marítima da cidade na Fase 1 de 'Abrir Ferrol ao mar'.

   Así mesmo, destinaranse 2,9 millóns de euros en 2025 para "converter Ferrol nun polo de práctica deportiva". As intervencións levarán a cabo en catro zonas diferenciadas do eixo A Malata-FIMO-A Cabana: Zona de actuación 1. Cidade Náutica da Cabana; Zona de actuación 2. Pavillón da Malata e Pistas de Atletismo, Campo de Rugby e Pistas de Tenis; Zona de actuación 3. Instalacións do antigo recinto feiral de FIMO na Malata e a Zona de actuación 4. Estadio da Malata.

PONTEVEDRA E O GRAN MONTECELO

   Por outra banda, o presidente provincial do PP de Pontevedra, Luís López, celebrou que os orzamentos da Xunta para a provincia sexan "os máis altos da historia", cun investimento de 4.077 millóns de euros para a provincia de Pontevedra.

   Máis pormenorizadamente, na cidade de Vigo, destaca a partida de case 10 millóns de euros para o centro de asociacionismo da rúa Lalín, os 6,5 millóns de euros para os centros de Investigación da Universidade de Vigo (Attlantic, Cinbio, Investigación Mariña, Procesos Industriais, Ecobas e Gradiant) e os dous millóns de euros para o desenvolvemento do ámbito PS-1 da ETEA que levará a cabo en convenio con Zona Franca.

    Na cidade de Pontevedra, a obra do Hospital Gran Montecelo conta cun investimento para a execución da primeira fase do plan de investimentos para a posta en servizo, que alcanza os 30 millóns de euros, que se suman aos 41,2 millóns de euros que se destinarán ás obras, que acabarán o próximo ano.

    Consígnanse tamén 3,6 millóns de euros para o dragado do río Lérez.

    A nivel provincial, destaca a partida para a base de helicópteros de Lalín, de 1,2 millóns de euros, "profundando na aposta pola prevención e extinción de incendios forestais".

MÁIS DE 12 MILLÓNS DE EUROS EN VIVENDA PARA LUGO

   Para a provincia de Lugo, a portavoz popular Elena Canida destacou o catro millóns de euros para a remodelación da residencia das Gándaras e os 1,4 millóns de euros para a residencia de maiores da Milagrosa.

    Tamén destacou os 4,7 millóns de euros para a ampliación do parque empresarial das Gándaras e os 12,1 millóns de euros que se destinan á promoción de vivenda pública.

   A estación intermodal de Lugo tamén consegue partida orzamentaria, de 6,2 millóns de euros, así como a reforma do estadio lucense Anxo Carro, cun investimento de tres millóns de euros que se distribuirá en dúas anualidades.

REMODELACIÓN DO CHUO (OURENSE)

   Por último, a Xunta destacou nun comunicado que se destinan 1.749 millóns de euros á provincia de Ourense nos orzamentos de 2025, dos que máis de 238 millóns corresponden á capital.

   As obras do Complexo Hospitalario Universitario de Ourense (CHUO) levan 27 millóns de euros, como en 2024. Segundo sinalan, para continuar co Plan Director recóllense compromisos plurianuais até 2027 por importe total de 29,4 millóns de euros.

   Tamén se reservan 600.000 euros para a humanización de espazos hospitalarios e prevese a adqusición de ecógrafos para os hospitais comarcais de Valdeorras e Verín.

    Avanzan tamén que o Goberno galego destina unha partida específica dun millón de euros a cofinanciar as actuacións que reactivarán a Praza de Abastos nº1 de Ourense, así como 10,23 millóns de euros para o Parque Tecnolóxico de Galicia (Tecnópole).