Axencias inmobiliarias urxen dar saída a pisos baleiros, máis construción e axudas á rehabilitación

   Concellos fixan como prioridade a vivenda con medidas como a declaración de mercado tensionado

   A CORUÑA, 2 Feb. (EUROPA PRESS) -

   O sector inmobiliario en Galicia urxe dar saída aos pisos baleiros existentes para abordar "a curto prazo" o problema da vivenda pero avanzando noutras medidas como máis construción ou axudas á rehabilitación. Mentres, concellos fixan como prioridade este asunto con actuacións como a declaración de mercado tensionado para lograr, entre outros obxectivos, rebaixar o prezo do aluguer.

   En declaracións a Europa Press, a presidenta da Asociación Galega de Inmobiliarias (Agalin), Emma Martínez de la Fuente, explica que a situación das grandes cidades galegas é similar á doutras urbes españolas "en canto á subida de prezos e escaseza de oferta, tanto en aluguer como en venda".

   "Falta vivenda porque durante os últimos anos non se construíu e cada ano temos necesidade de máis número de fogares". "Cada vez son máis pequenos en número de persoas que os habitan", explica para apuntar que a solución "a curto prazo" sería "dar saída á vivenda baleira". "Pero é necesario a incorporación de obra nova", recalca.

   En canto ao aluguer, sinala que o prezo medio en decembro de 2024 dunha vivenda en aluguer en Galicia rexistrou un aumento dun 9,4% no último ano. "Cabe resaltar que o aumento na provincia da Coruña foi dun 12,9%, Lugo 7,9%, Ourense 4% e Pontevedra un 6,1%".

   "A oferta de alugueres baixou durante todo o ano e é o que provocou esa subida de prezos, aínda así hai moita rotación de stock e tárdase moi pouco en alugar unha vivenda desde que se pon no mercado, maioritariamente menos dunha semana", aclara.

   En canto ao prezo medio de venda en Galicia en decembro 2024 foi, indica, de 1.437 euros metro cadrado, o que supón un aumento dun 4,5% fronte a decembro 2023. Os datos nacionais son un prezo medio de 2.271 euros metro cadrado cun aumento de prezos do 11,2%.

   "As cidades como A Coruña teñen un prezo medio de 2.680 euros metro cadrado, Santiago 2.029 euros, Pontevedra 2.005 euros e Vigo 2.278 euros o metro cadrado", concreta.

MERCADO TENSIONADO

   En canto ás iniciativas nas grandes cidades galegas para declarar mercado tensionado, a presidenta de Agalin afirma que "se se declarase mercado tensionado nalgúns concellos conseguiríase conter os prezos pero, como pasou noutras zonas, diminuiría máis a oferta".

   "Moitos propietarios xa nos comunicaron que deixarían de alugar ou buscarían outras fórmulas máis rendibles e con máis garantías". "Desde Agalin cremos que, para mobilizar máis vivenda en aluguer, deberíanse de subir os límites establecidos no programa de 'Vivendas vivas', pór en marcha axudas á rehabilitación para incorporar ao mercado moitas das baleiras que necesitan reforma e dar seguridade xurídica en casos de falta de pagamento".

SITUACIÓN EN CONCELLOS

   Por outra banda, consultados por Europa Press, desde o consistorio herculino -- no que que estiman que hai 14.000 vivendas baleiras no municipio -- afirman que "aínda sen ter competencias en vivenda, o Concello ten en marcha a construción de 55 vivendas sociais para sumalas ao seu parque municipal de 414".

   A iso, engade o desenvolvemento dos polígonos urbanísticos, ademais da axilización de trámites de licenza para nova construción e restauración. "O plan de vivenda contempla a construción de máis de 4.000 vivendas até o 2030", precisan.

   Fano após ratificar que neste trimestre remitirán á Xunta o informe para a declaración da urbe como mercado tensionado o que, inciden, suporía "importantes aforros fiscais para os arrendadores e un aforro substancial tamén para os inquilinos", así como acceso a axudas por parte do consitorio.

   Desde Santiago de Compostela, anunciouse en xaneiro a solicitude da declaración da totalidade do municipio como zona residencial tensionada co obxectivo de regular o prezo do aluguer. E é que desde este consistorio insistiuse en que a vivenda, como "reto conxunto" de todas as administracións, será un dos temas que priorizarán.

   Farao, explican, a través de varias liñas de traballo, entre elas a rehabilitación de inmobles para vivenda e iniciativas encamiñadas a promover a vivenda tutelada, ademais do proceso para declaración de zona tensionada. Outro "avance", remarcan, a creación dunha entidade pública de vivenda de cara a priorizar a rehabilitación e o aluguer.

EFECTO DAS VIVENDAS TURISTICAS

   Neste contexto, desde Ecoloxistas en Acción alertan das consecuencias das vivendas para uso turístico, o que, engaden, "bota fóra" aos residentes en barrios con máis turismo.

   Respecto diso, precisan que Vigo "é a cidade onde máis creceron no últimos catro anos, cun incremento do 113,2%", aínda que destacan tamén o dato da Coruña, na que, desde o goberno local, informouse recentemente que a nova ordenanza que aprobará esixirá cumprir requisitos, como contar coa habilitación administrativa, que agora incumpren a metade das máis de 1.300 existentes.

   En Santiago de Compostela, está, mentres, aprobada a ordenanza que as regula, en aras ao obxectivo, ademais, de facilitar a incorporación de oferta ao mercado de venda ou aluguer.

   Desde o Concello de Vigo indican que responden á demanda cun novo Plan Xeral que incluirá "45.000 vivendas libres de especulación, das que 15.000 estarán sometidas a algún réxime de protección". "As novas promocións reservan un 30% da construción de vivenda para vivenda protexida, moi por encima do que marca a lei e o novo Plan Xeral de Ordenación Municipal limita os pisos turísticos que poderán situarse en edificios que teñan unha entrada distinta á do resto de residentes".

   A iso, suma, entre outras, unha liña de axudas "para sacar ao mercado de aluguer as 12.000 vivendas que están baleiras na cidade" e incide en que xa subvencionaron para áreas de rehabilitación integral "máis de 2.000 actuacións". Sobre se solicitará a declaración de mercado tensionado, insiste en que o importante é "incrementar a oferta", apelando a esta respecto da Xunta tamén.