Bandeiras a media hasta no Bolo e tres días de loito polo crime de Josefa a mans do seu marido

   "A prevención non pode depender de sorte nin do tamaño do municipio", alerta un edil do PP neste concello de menos de mil habitantes

   O Bolo (OURENSE), 7 Abr. (EUROPA PRESS) -

   O Concello do Bolo (Ourense) acordou por unanimidade decretar o loito no municipio desde as 14.00 horas deste luns até as 23.59 do mércores 9 ante o crime que acabou coa vida de Josefa, quen se converteu na primeira vítima mortal por violencia de xénero en Galicia este ano.

   Así o decidiu a corporación municipal en pleno no mediodía deste luns, presidido polo alcalde, Alberto Vázquez. Nel oficializouse o minuto de silencio que terá lugar este martes ás 12.00 horas fronte ao consistorio desta localidade ourensá.

   Co decreto do loito acordaron trasladar a "condolencia e solidariedade" do pleno e veciños á familia da falecida, veciña das Ermidas, unha das parroquias deste municipio de case 800 habitantes. Ademais, tras a reunión municipal baixaron as bandeiras, que até o final do loito ondearán a media asta.

   Previo á celebración do pleno, o rexedor asegurou en declaracións aos medios de comunicación que no Concello non tiñan constancia de "ningún caso de violencia de xénero", xa que así llo trasladou a Garda Civil na reunión anual que manteñen sobre esta e outras cuestións.

COMUNICADO DO PP MUNICIPAL

   O concelleiro popular Antonio López expresou en pleno, en representación da formación municipal, a súa "firme condena e fonda tristeza polo crime machista" e trasladou o "pesar" á familia da vítima e veciños das Ermidas, que están a vivir "con dor e incredulidade unha perda que nunca debería suceder".

   O comunicado da formación popular do Bolo centrouse no impacto da violencia de xénero nas contornas de municipios pequenos, como é o caso do Bolo: "A prevención non pode depender da sorte nin do tamaño do concello. Ten que ser un dereito garantido para todas as mulleres vivan onde vivan".

   Deste xeito, López sinalou que a violencia machista "non entende de lugares, nin de idades, nin de circunstancias", polo que tamén sucede "nos pobos pequenos, onde a falta de recursos ou o illamento e o medo son máis difíciles que as vítimas poidan dar o paso para pedir axuda".

   Nesta liña, o edil reclamou a implicación "decidida e urxente" de todas as administracións para reforzar os medios de prevención, de atención e de protección fronte á violencia de xénero, especialmente no rural.

   Por iso, pediu "máis recursos" para os centros de saúde e servizos sociais de proximidade, "máis formación específica" para os equipos encargados da atención á poboación --como Protección Civil ou a Garda Civil-- e "máis campañas informativas", que cheguen á xente "sen eufemismos nin distancias".

   Así mesmo, López expresou que é tarefa dos representantes públicos "esixir" que se poña en marcha "todo o necesario para que ninguén quede atrás", xa que cre que "a violencia machista non é un problema privado", senón "unha cuestión colectiva" que interpela a todos "como sociedade".

   "Todas e todos temos un papel: podemos actuar, podemos apoiar, podemos detectar sinais e podemos acompañar", engadiu este represente popular do Bolo, que se comprometeu a traballar para que o concello sexa "un lugar máis seguro e libre de violencia".