O BNG non emendará o ditame por consideralo "un panfleto" do PP e presentará un voto particular

   Os nacionalistas cren, no entanto, que "foi un acerto" crear este órgano a pesar dos "atrancos" que achacan á Xunta e aos populares

   SANTIAGO DE COMPOSTELA, 26 Dic. (EUROPA PRESS) -

   O BNG confirmou este xoves que non presenta emendas ao ditame elaborado polo PP para a comisión de investigación da contratación da Xunta, por velo "un panfleto" e "un mal chiste". "Un panfleto non se emenda", sentenciou a deputada Montse Prado, en rolda de prensa.

   No entanto, os nacionalistas si rexistrarán con posterioridade un voto particular á resolución, que recibirá --salvo sorpresa maiúscula-- o visto e prace do pleno do Parlamento en xaneiro, unha vez arrinque o novo período de sesións.

   Este xoves, cando falta un día para que conclúa o traballo desta comisión, compareceron ante os medios, ademais de Prado, os deputados Óscar Insua e Iago Tabarés para denunciar de novo que o PP busca "dar carpetazo" a este órgano canto antes.

   Trátase dunha comisión cuxa creación impulsou o BNG ante o que considera unha "alarma social" tras facerse público o informe do Consello de Contas que apuntaba a un "sobreprezo" de 470 millóns de euros na construción do Hospital Álvaro Cunqueiro de Vigo, por escoller a concesión de obras públicas; e outras informacións sobre os contratos menores e de emerxencias emprendidos pola Xunta durante a pandemia da covid-19.

   Prado lembrou que o propio PP impulsou "no Senado", onde conta con maioría absoluta, unha comisión sobre os contratos de emerxencia a nivel estatal. En cambio, en Galicia, o que fixeron os populares foi "tentar que non se investigase nada" e "opúxose a todos os intentos do BNG para que isto fose así".

   A nacionalista censurou que "desde o primeiro momento" o PP tentou "boicotear" este órgano "non facilitando documentación" desde a Xunta e "impondo o plan de traballo" e, por tano, "impondo" os comparecentes e os documentos a revisar.

   Ademais, "o PP xa tiña desde o primeiro momento as conclusións feitas" e redactounas "en tempo exprés", xa que as presentou á oposición cinco días despois da última das comparecencias.

"É UN SINXELO PANFLETO"

   A principal conclusión do borrador do ditame --ao que o PP presentou unha emenda que profunda nas mesmas ideas-- é que non houbo "nin unha soa tacha de legalidade" nin na construción do Álvaro Cunqueiro nin nos contratos menores e de emerxencias.

   Para o BNG, o texto "repite o argumentario" defendido polos populares. "Non é un ditame, é un sinxelo panfleto", engadiu, para seguidamente afear ao PP que convertese a comisión nunha "parodia", nunha "farsa democrática" e nunha "burla" ao Parlamento.

   Prado dixo que o ditame que se aprobará este venres consiste en "sacar de contexto" documentación e frases dos comparecentes. "Non lle damos carácter de ditame a isto que vai presentar mañá o PP", insistiu, para seguidamente queixarse de que a comisión concluirá os seus traballos sen que os grupos teñan "as transcricións" das sesións ao completo.

   Así mesmo, a deputada do BNG centrou boa parte da rolda de prensa en denunciar que a Xunta e o PP ocultaron "á mantenta" documentación sobre os contratos con Eulen --empresa que ten como directiva para o Noroeste a Micaela Núñez Feijóo, irmá do expresidente galego Alberto Núñez Feijóo-- e sobre o levantamento do Álvaro Cunqueiro.

   "Xa sabiamos que o PP era experto en ocultar información", ironizou Prado, para referirse á suposta destrución de discos duros de Luís Bárcenas "a marteladas". "Agora, o que fixo foi burlarse deste Parlamento", engadiu a nacionalista.

CONVERTER A SANIDADE "NUN NICHO DE NEGOCIO"

   Neste contexto, o BNG nega que o bipartito que gobernou a Xunta entre 2005 e 2009 non tivese nada feito para construír o hospital vigués pola vía pública. "Si había moitos pasos dados", sostivo, como unha partida nos orzamentos da Sociedade Pública de Investimentos (SPI) e o plan básico.

   "O que fixo o PP ao chegar á Xunta --en 2009-- foi cambiar ese modelo e tomar unha serie de decisións para converter a sanidade, neste caso a construción do Hospital Álvaro Cunqueiro, nun nicho de negocio para empresas privadas", denunciou.

   Así mesmo, Prado inclúe na ecuación a Rodrigo Rato, porque foi presidente de Bankia, un dos bancos que financiou á UTE que construíu o hospital; e a Luís de Guindos, porque foi alto directivo de PriceWaterhouseCoopers (PwC), a consultora que foi "encargada de seleccionar" á UTE. "Todo un entramado empresarial", resumiu.

   A deputada tamén aproveitou a rolda de prensa para sacar dous documentos que o BNG xa empregou durante as sesións da comisión. Un deles, de PwC, demostra --segundo a súa valoración-- que "se aumentou exponencialmente os servizos concesionados" do complexo hospitalario vigués; e outro, neste caso interno do Sergas, que cifra en 30 millóns de euros a diferenza entre a superficie proxectada e a que finalmente se construíu.

   Ademais, sobre os 470 millóns de euros que, segundo Contas, custou o Álvaro Cunqueiro por non licitarse obras e servizos por separado, "como planificara o bipartito", Prado destacou que o máximo responsable deste órgano fiscalizador, Juan Carlos Aladro, confirmou que isto fose así na súa comparecencia.

   Aínda que Aladro rebaixou o suposto "sobrecusto" a 165 millóns ao falar de valor anual neto (VAN), o BNG recalca que o que fixo foi "levalo a euros constantes, de agora". "É lícito, pero non desmentiu que fose así", concluíu Prado.

O BNG CRE QUE "FOI UN ACERTO" CREAR A COMISIÓN

   En definitiva, os nacionalistas presentarán o seu voto particular ao ditame por estar "máis de convencidos de que foi un acerto" impulsar a comisión "a pesar de todos estes atrancos" que atribúe ao PP.

   Con todo, cabe lembrar que o BNG presentou hai semanas un recurso de amparo ante o Tribunal Constitucional por "vulneración total dos dereitos dos deputados", polo control de facto que fixo o Grupo Popular dos traballos da comisión, que fixo que a Cámara galega "parézase máis a unha república bananera que a un parlamento democrático".

   Sen prazo para que este órgano xudicial resolva, Montse Prado ironizou con que "para unhas cousas é moi diligente" e contesta "en horas", mentres que para outras o Constitucioinal demórase máis.

   "Esperemos que o fagan en tempo razoable. Polo menos, o recurso está ben avalado, xustificado e con xurisprudencia", sinalou.