O BNG propón unha moratoria do eucalipto até 2030 e acusa ao PP de converter Galicia "nun eucaliptal"

   Pontón denuncia que o control do monte galego "está en mans" de Ence, Altri e Navigator, "a través de portas giratorias"

   SANTIAGO DE COMPOSTELA, 21 Mar. (EUROPA PRESS) -

   A portavoz nacional do BNG, Ana Pontón, avanzou que o Bloque levará ao Parlamento propostas "serias e rigorosas" para abordar a ordenación do monte cunha moratoria de plantación de eucaliptos até o ano 2030 fronte a un goberno do PP que "converteu Galicia nun eucaliptal".

   En rolda de prensa este venres tras reunirse con representantes de entidades do monte e do ámbito forestal para analizar a situación do sector, a líder nacionalista asegurou que a moratoria de plantación de eucaliptos é "imprescindible" para frear "o descontrol da proliferación" desta especie.

   Por iso, propuxo un novo modelo que aborde o monte desde "unha perspectiva multifactorial, que combine con especies autóctonas e madeiras de calidade", como medida "clave" en Galicia para "abordar o desafío do cambio climático".

   "Apostamos pola ciencia e a innovación para xerar produtos de maior valor engadido para que se pechen en Galicia os ciclos produtivos da madeira", apuntou Pontón.

   Estas son as decisións, dixo, que tomaría un goberno do BNG, fronte a un executivo do PP que "defende os intereses de Altri e recupera o franquismo industrial das macrocelulosas". "En 1963 o franquismo impuxo Ence na ría de Pontevedra e en 2025 o Goberno de Rueda o único que ten que ofrecer a Galicia é outra macrocelulosa, a bomba ambiental de Altri", destacou.

   Nesta liña, subliñou que o BNG "vai facer todo o posible" para que o PP "non hipoteque o futuro de Galicia, para que a vida da xente do mar sexa máis importante que o resultado dunha empresa portuguesa como Altri".

PORTAS XIRATORIAS

   Ademais, Pontón reprochou ao PP que "converteu Galicia nun eucaliptal" e, ao seu xuízo, "Altri suporá aínda máis eucalipto" nos montes galegos, así como "máis riscos" contra o medioambiente e contra a seguridade das persoas.

   Neste sentido, denunciou que o control dos montes galegos "está en man de tres grandes pasteiras": Ence e as portuguesas Altri e Navigator, que "usan o mecanismo das portas xiratorias para controlar a compra e implantación de eucaliptos en Galicia".

   Nesta liña, censurou que Ence "sempre tivo a exaltos cargos do PP" no seu consello de administración e, agora, "as pasteiras portuguesas copian ese modelo de portas xiratorias porque saben que funciona". "Altri faino a través da alianza con Greenalia, a empresa da que forma parte a exconselleira de Medio Ambiente Beatriz Mato, compañeira de partido de Rueda; e Navigator acaba de fichar ao exdirector xeral de Conservación da Natureza do PP, Ricardo García Borregón", reprochou.

   Por todo iso, insistiu en que hai que dar "un xiro de 180 graos á ordenación e xestión do monte para polo ao servizo do país, acabando coas portas xiratorias e con esas cadeiras que teñen eses intereses no Consello da Xunta".

MANIFESTACIÓN A POBRA DO CARAMIÑAL

   Así mesmo, cuestionada sobre a manifestación prevista este sábado na Pobra do Caramiñal contra a instalación de Altri en Palas e a Mina de Touro-O Pino, Pontón insistiu en que a mobilización social é "clave".

   "Creo que un goberno que non escoita á súa cidadanía é un goberno que non respecta a democracia. Os galegos teñen dereito a manifestarse, é un dereito democrático fundamental e cando os gobernos toman decisións en contra da xente, o único que nos queda é a mobilización. É fundamental que este sábado volva ser un clamor social en contra da bomba ambiental de Altri", reivindicou.