O BNG reivindícase como "a forza máis útil para Galicia" e augura "un grupo forte no Congreso"

Pontón afirma que un deputado do BNG na Cámara Baixa fixo máis que os 22 das forzas restantes e insiste en pedir a Rueda un debate

   SANTIAGO DE COMPOSTELA, 1 Jul. (EUROPA PRESS) -

   O BNG celebrou este sábado no Auditorio de Galicia, en Santiago de Compostela, a convención nacional na que aproveitou para presentar ante militantes e simpatizantes os cabeza de lista das súas candidaturas ao Congreso e ao Senado para as eleccións do próximo 23 de xullo, onde se volveu a reivindicar como "a forza máis útil para Galicia" e augurou "un grupo forte" na Cámara Baixa.

    O acto, que arrincou pouco antes das 18,30 horas, celebrouse nun auditorio que presentaba un cheo case total e que tivo como anfitrioa á alcaldesa da capital galega, Goretti Sanmartín, que deu a benvida aos asistentes lembrando o "fito histórico" que asegura supuxo que Santiago estea gobernada por primeira vez por unha muller.

   Con este logro como exemplo, Sanmartín instou aos nacionalistas a "saír a gañar" o próximo 23J e reivindicou que "un deputado do BNG vale por moitos deputados das forzas estatais".

   Así, mostrouse convencida de que o próximo 25 de xullo, na celebración do Día Nacional de Galicia, os nacionalistas poderán celebrar a consecución da alcaldía de Santiago e "ter un grupo forte en Madrid", para pasar a falar de "estar preparados" para "chegar á presidencia da Xunta cando se convoquen as eleccións galegas".

   A continuación, tras a intervención dos candidatos do Bloque ao Congreso, tomou a palabra a portavoz nacional, Ana Pontón, que iniciou o seu discurso entre aplausos apelando a Rosalía de Castro, a Rosa Parks ou ás sufraxistas e aos logros dun BNG que "non acepta un 'non' por resposta". "Hoxe o BNG está máis preto de ter a presidencia da Xunta de Galicia", proclamou.

    "Quero pedir a todas as persoas que queren a este país que voten coa cabeza e o corazón en Galicia. O BNG é a única forza política que vai facer respectar Galicia en Madrid, a única coas mans libres", destacou antes de insistir en que o Bloque ten que estar en Madrid "con forza" para "dar a cara" pola xente de Galicia. "Ou o facemos nós ou non o fai ninguén", resolveu.

UN DEPUTADO "MÁIS ÚTIL QUE OS 22 RESTANTES"

   Neste contexto, Pontón argumentou que un só deputado do BNG, Néstor Rego, foi "máis útil que os 22 restantes" obtendo logros como "unha rebaixa histórica nas peaxes da AP-9". "Un só deputado do BNG evidenciou as súas vergoñas. Mentres o BNG logrou unha rebaixa nas peaxes da AP-9, as forzas estatais levan 8 anos boicoteando a transferencia, enganando e tomando o pelo á xente", relatou.

   Por iso, defendeu que para construír "unha Galicia en grande" é importante "ter un grupo galego forte" que faga que Galicia "sexa respectada en Madrid". E ese é o obxectivo que se marcan os nacionalistas de cara ao 23 de xullo. Unha meta para a que Pontón se mostrou "convencida" de contar "coa forza de miles de galegos que están fartos de tanta discriminación e ninguneo a Galicia".

   Na súa intervención, a líder do Bloque lanzou outra mensaxe á cidadanía: "Non é o momento de votar polo mal menor, nin de votar por medo. Pídolle a todos os galegos que o 23 de xullo voten con ilusión, con esperanza. O BNG non lles vai a fallar".

DEBATE ALFONSO RUEDA

   Así mesmo, Ana Pontón tamén lamentou que o líder do PPdeG e presidente da Xunta, Alfonso Rueda "non quere" un debate electoral con ela. "Ten medo", asegurou Pontón, porque, cuestionou, "que vai contar?".

   Nesta liña, a portavoz nacionalista tamén afirmou que a Rueda "dálle pavor" que os galegos poidan "ver e escoitar en prime time ao BNG".

   Aínda sobre esta cuestión, Pontón criticou que o líder popular, ante a demanda deste debate, lle dixera que está "necesitada de atención", algo que a portavoz tachou de machismo.

   "Se o debate o pide un home, como Feijóo en 2008, é o campión dos debates, pero se quen o propón é unha muller, neste caso eu, a resposta de Rueda é que estou necesitada de atención. As mulleres non temos que aguantar estes comentarios machistas nin na vida nin na política", reprochou.

OURENSE E LUGO "VAN ESTAR"

   Ademais, na convención nacional celebrada na capital galega este sábado tamén participaron os candidatos da formación ao Congreso. En primeiro lugar, tomou a palabra Noa Presas, cabeza de lista por Ourense, que prometeu que o BNG "estará contra toda inxustiza" e reclamará "o que pertence" a Galicia.

   Por iso, augurou un grupo galego "forte" no Congreso no que, proclamou, "Ourense tamén vai estar" para facer "posible o imposible".

   Con esta mesma intención comezou o seu discurso o número 1 ao Congreso por Lugo, Daniel Castro: "E se si? E se temos grupo propio? E se temos tamén deputado por Lugo e Ourense?".

   "Imaxinade un BNG forte no Congreso que obriga ao Goberno a facer o que non quere, que consegue que Lugo teña infraestruturas, que na Mariña pasemos a ter a autovía A-74, que consiga ter unha liña de ferrocarril do século XXI, que consiga que Lugo teña tren ou que consiga reactivar a demografía de Lugo Sur. Todo isto é posible, pero, sobre todo, é necesario", reivindicou.

   Para conseguilo, pediu que se lle diga a todo o mundo que o "voto útil en Galicia é o BNG", porque é o único que "vale por dous". Nesta liña, fixo un chamamento especial á mocidade para que "encha as urnas de votos do BNG" para, despois, "pór a Ana Pontón de presidenta da Xunta".

   Pola súa banda, a cabeza de lista por Pontevedra, Carme da Silva, puxo o acento en ter "fe" e "confianza" no pobo galego e nas posibilidades do Bloque. Así, pediu derrotar "ao centralismo abafante con máis BNG en Madrid" e defender "a recuperación das rías e o litoral, o medio natural e o patrimonio" para "unha transición enerxética xusta".

   "Por unha tarifa eléctrica galega, por unha empresa pública de enerxía, para que Galicia conta con máis forza o 23 de xuño máis BNG, moito máis BNG", defendeu da Silva.

   Do mesmo xeito, Néstor Rego, que aspira a repetir escano no Congreso pola provincia da Coruña, iniciou a súa intervención agradecendo o apoio nos últimos anos "sendo o único representante do BNG en Madrid", a pesar do que, segundo afirmou, nunca se sentiu só.

   Tras este agradecemento, explicou que estamos ante uns comicios que son "unha gran oportunidade" para Galicia e para os que o BNG conta "co aval do traballo feito" e "a lexitimidade de cumprir os seus compromisos co pobo galego".

   "O BNG foi fundamental para que se producisen avances en dereitos sociais e políticas máis xustas sempre marcando con coherencia un horizonte máis aló, confrontando coa ultradereita e cunha esquerda española sempre proclive a encartarse ás esixencias dos poderes fácticos e a incumprir os seus compromisos", sinalou.

   Entre os logros que puxo en valor este sábado Rego, o acordo de investidura que "desbloqueou a axenda galega". Con todo, recoñeceu que, a pesar de cumprir unha parte con cuestións como "o desconto da AP-9, a drenaxe da ría do Burgo ou a modernización da liña Lugo-Ourense, outra parte foi "gravemente incumprida", como "a creación de xulgados de violencia de xénero ou as competencias pendentes á administración galega".

   "Non se trata só de arrincar compromisos a favor do noso país, senón de ter a forza suficiente para facer que se cumpran. Necesitamos de máis forza, de máis representación, dun grupo galego forte en Madrid e temos a certeza de que imos conseguilo", salientou.