O BNG rexeita que MIR de último ano reforcen no verán: "Unha medida excepcional non pode ser permanente"

   Montse Prado pide medidas "urxentes" e anima á cidadanía a acudir o domingo á mobilización pola sanidade pública

   SANTIAGO DE COMPOSTELA, 31 Mar. (EUROPA PRESS) -

   A deputada do BNG Montse Prado mostrou o seu rexeitamento á medida da Consellería de Sanidade de que os MIR de último ano reforcen os centros de saúde no verán, xa que considera que unha situación "excepcional" non debe converterse "en permanente".

   En rolda de prensa este luns, a parlamentaria nacionalista reprochou a Sanidade que anuncie que "a situación vai estar moi complicada" este verán, "que non hai profesionais, que van xubilarse moitos médicos en 2025". "Que sorpresa; non o sabiamos", ironizou antes de tachar de "dramático" que o Goberno galego "actúe desta forma".

   Para Montse Prado, o departamento autonómico "volve á situación de excepcionalidade" de que os MIR, "que aínda non finalizaron a súa formación", sexan contratados "para cubrir a falta de profesionais". "Queren converter unha medida excepcional, para un momento concreto, en normal. Opoñémonos, igual que colectivos de profesionais e sindicatos, a que unha medida excepcional poida converterse en permanente", reprochou.

   Segundo a deputada do BNG, o PP "non ten intención de superar os problemas" nesta materia e acusou aos responsables de "improvisación para facilitar o negocio ás empresas multinacionais".

ANUNCIOS XUNTA

   Ademais, Montse Prado sinalou na súa intervención que o PP, un ano despois de iniciarse a lexislatura, non pasou "dos anuncios" á "realidade". En concreto, mencionou o plan de RRHH, a introdución de psicólogos clínicos en atención primaria, o novo plan de saúde mental ou o novo modelo de atención primaria.

   Neste contexto, Prado asegurou que o PP é "letal" para a sanidade pública galega" e criticou que todas as medidas tomadas "tiveron como obxectivo a deterioración da sanidade".

    Nesta liña, pediu non aceptar "como normal" o "mantra" de que "non hai facultativos". "Non os hai porque o PP non quixo planificar. A realidade é que hai profesionais doutras moitas categorías e tampouco contratan", insistiu.

   Do mesmo xeito, censurou que "tampouco queren actuar sobre as causas que xeran falta de profesionais", entre as que mencionou "as condicións laborais, a carga asistencial e non planificar as necesidades de formación dos profesionais". Tamén acusou ao PP de "drenar profesionais cara á sanidade privada", xa que "nestes momentos ofrece máis estabilidade".

   Doutra banda, a parlamentaria do Bloque pediu á Xunta que tramite "por urxencia" o contrato do servizo dos helicópteros do 061 de Santiago e Ourense despois de anunciar a rescisión do mesmo por "reiterados incumprimentos do servizo".

MANIFESTACIÓN 6 DE ABRIL

   Así mesmo, fixo un chamamento á cidadanía a que acuda á mobilización convocada pola Plataforma SOS Sanidade Pública este domingo, 6 de abril.

   Para Montse Prado, é "urxente" que o PP "rectifique" e poña en marcha o plan de Recursos Humanos, así como un plan de choque para acabar coas listas de espera.

    En definitiva, que tome medidas "estruturais" e finalice coa "excepcionalidade de contratar profesionais MIR para solucionar problemas estruturais".

   Tamén pediu a comparecencia do conselleiro no Parlamento para dar explicacións sobre a caída do falso teito nunha planta do Hospital Materno Infantil de Ourense. Prado quere que Gómez Caamaño dea explicacións do ocorrido e avance "que medidas vai tomar para pechar este centro e deixar de pór en risco a profesionais e persoas que acoden alí".