Catro mortos e un ferido grave ao precipitarse por un barranco un coche en Xove (Lugo) logo de saírse da vía

Europa Press Galicia
Actualizado: sábado, 1 abril 2023 11:53
@epgalicia

   SANTIAGO DE COMPOSTELA, 1 (EUROPA PRESS)

   Dous homes e dúas mulleres faleceron nun accidente de circulación rexistrado na mañá deste sábado no municipio lugués de Xove no que tamén resultou ferido de gravidade o conductor do coche.

   Segundo informou a Garda Civil, o sinistro produciuse ás 09,40 horas deste sábado no punto quilómetro 1,100 da estrada LUP-2604, onde un turismo no que viaxaban cinco persoas, todas elas novas, sufriu unha saída de vía e acabou despeñándose por un barranco.

As vítimas mortais son dous homes e dúas mulleres, todos eles veciños de Ribadeo (Lugo) e entre os que hai menores de idade, segundo trasladaron fontes do dispositivo de emerxencias consultadas por Europa Press.

O condutor foi o único sobrevivente do sinistro, aínda que se atopa en estado grave. Os servizos de emerxencia confirmaron que, unha vez estabilizado, foi evacuado ao hospital Lucus Augusti da capital provincial polos profesionais de Urxencias Sanitarias 061.

O vehículo saíuse da vía nunha curva pechada e acabou precipitándose por unha altura de entre 3 e 4 metros para terminar no interior dunha leira privada, segundo confirmou a Europa Press o rexedor de Xove, Demetrio Salgueiro.