SANTIAGO DE COMPOSTELA, 14 Jun. (EUROPA PRESS) -
CC.OO. alerta das "graves repercusións sociais" que para Galicia tería "o desmantelamento dunha entidade financeira netamente galega", polo que pide aos partidos políticos que se impliquen na defensa do emprego e das condicións laborais do Banco Popular, tras a súa compra por Santander.
Este sindicato continuou este mércores coa rolda de contactos cos grupos parlamentarios, para tratar a situación da entidade financeira tras a operación de adquisición materializada a semana pasada.
Tras reunións o martes con En Marea e PP, esta xornada tocou o encontro con representantes do grupo dos socialistas galegos na Cámara autonómica.
A federación de servizos recibiu por parte do PSdeG a mensaxe de que comprenden e asumen a complexidade da situación, segundo sinala CC.OO. nunha nota de prensa. Asegura, así mesmo, que mostrou a súa "receptividade e colaboración" tanto no ámbito parlamentario como no político-social.
A delegación de CC.OO.-Servizos estivo integrada pola secretaria xeral, Lucía Trenor; a responsable da sección sindical do Popular, Carmen Peteiro, e polo do sector financeiro de Comisións, Francisco Villares.
TRABALLO COORDINADO
CC.OO.-Servizos ten a representación maioritaria no ámbito estatal e autonómico nas empresas afectadas, segundo reivindica. É dicir: nos dous bancos e nas empresas que lles prestan servizos.
Así, indica que todas as seccións sindicais implicadas están a traballar coordinadamente desde que se coñeceu a operación de adquisición.
"Isto entra no calendario de encontros, que se estenderán á dirección do Banco Santander e Universal Support --centro de chamadas con máis de 200 persoas afectadas-- tamén nesta semana", avanza.
Andalucía
