A CIG denuncia que as urxencias pediátricas do CHUS están "desbordadas" porque "non se planificou ao persoal"

   SANTIAGO DE COMPOSTELA, 30 Nov. (EUROPA PRESS) -

   A Confederación Intersindical Galega (CIG) denunciou este mércores por "a situación de saturación" que padecen as Urxencias de Pediatría do Complexo Hospitalario Universitario de Santiago (CHUS) e indicou que a xerencia "non planificou as necesidades de dotación de persoal para dar unha asistencia segura e de calidade".

   O sindicato sinalou nun comunicado que hai "un notorio incumprimento da dirección do hospital das funcións e normas reguladoras do funcionamento" das urxencias pediátricas. Así, subliñou este servizo "vese desbordado cada día, cunha media de 150 nenos por día, chegando a máximos de 200".

   Ademais, afirmou que "se mantén o mesmo persoal de enfermaría, encargado de dobrar quendas para asumir o reforzo do persoal necesario", o que "impide os seus descansos e a conciliación familiar". Tamén subliñou que a xerencia "non contemplou unha previsión de formación de persoal en Pediatría".

   Nesta liña, demandaron que "tampouco se contemplaron cambios organizativos no traballo" e que "se seguen asumindo tarefas que podían ser desenvolvidas noutras unidades".

   Así mesmo, a CIG sinalou que "non se soluciona a precariedade laboral e estabiliza prazas" e que "existindo unha praza libre dunha persona de enfermaría que se foi de traslado e outra por unha incapacidade temporal, ambas seguen sen cobertura a día de hoxe".