O Comité de Emerxencia da Ría de Ferrol valora a anulación do TS da autorización administrativa previa de Reganosa

Sostén que o procedemento ambiental "foi vulnerado" pola empresa co "apoio" de concello e Xunta

FERROL, 4 Abr. (EUROPA PRESS) -

O coordinador do Comité de Emerxencia da Ría de Ferrol, Manuel Rodríguez Carballeira, considerou este luns "moi positiva" a sentenza do Tribunal Supremo pola que estima un recurso contencioso-administrativo presentado por diversas entidades e anula a resolución que outorgou a Reganosa a autorización administrativa previa para a instalación da súa planta de recepción, almacenamento e regasificación de gas natural licuado en Mugardos (A Coruña).

En concreto, o recurso foi interposto pola Asociación de Veciños O Cruceiro de Mehá, de Mugardos (A Coruña), e outras entidades entre as que se atopa o propio Comité de Emerxencia.

En declaracións a Europa Press, Carballeira mostrouse "moi contento por esta decisión" na que o Supremo "rectifica a sentenza anterior" do Tribunal Superior de Xustiza de Madrid e "vota a favor" do seu recurso.

Ademais, fixo fincapé en que no momento en que o Goberno central aprobou a citada autorización, "non existían" aínda nin o Plan de Urbanismo de Mugardos nin a súa modificación puntual, documentos que "deberían servir como basee para outorgar a licenza de construción".

Quen fose tamén concelleiro socialista no veciño concello de Fene, reiterou que "todo o procedemento ambiental foi vulnerado polos promotores de Reganosa, con apoio evidente no seu momento tanto dende o Concello de Mugardos coma dende a Xunta".

INCUMPRINDO A LEI

Ademais, augurou que a empresa tratará de dicir "que con eles non vai a cousa" xa que, dende a súa perspectiva, "para iso teñen de socio ao Goberno da Xunta, co aumento fai pouco do seu (parte no) conxunto de accionistas, e este é o elemento que lles facilita seguir incumprindo a lei".

Na mesma liña, Rodríguez Carballeira trasladou que, tras esta "nova sentenza negativa" do TS, non ten "ningunha dúbida de que se fará unha nova modificación de plan de urbanismo para seguir erre que erre para continuar aí" malia que "non hai que ser ningún experto en dereito para ver que está a tan só 100 metros das vivendas".

Neste punto, recordou que unha recente sentenza do mesmo tribunal "ditaminou a ilegalidade da planta de El Musel", en Gijón (Asturias), a pesar de que "está en mar aberto e a 1.000 metros da casa máis próxima", por "non cumprir as distancias coa poboación. Coa vista posta nas instalacións de Punto Promontorio, en Mugardos, remarcou que "incumpre mil veces máis".