O borrador contempla un período de adaptación até o 15 de setembro e fixa o Día do Ensino o xoves 7 de decembro
SANTIAGO DE COMPOSTELA, 31 Mar. (EUROPA PRESS) -
A Consellería de Cultura, Educación, FP e Universidades xa remitiu aos sindicatos a súa proposta de calendario escolar para o curso 2023/2024, que volve recoller que todas as etapas --Infantil, Primaria, ESO, Bacharelato e FP-- arrincarán e concluirán á vez as clases: do venres 8 de setembro ao xoves 20 de xuño, ambas as dúas datas incluídas.
As únicas excepcións, como vén sendo habitual, serán 2 de Bacharelato, xa que o fin do período lectivo dependerá das datas da Avaliación para o Acceso á Universidade (ABAU); e os ensinos de réxime especial, que terminarán o 28 de xuño.
Así figura no borrador remitido ás organizacións representadas na Mesa Sectorial --CIG, UXT, CCOO, ANPE e CSIF--, órgano que se reunirá o próximo 18 de abril para abordar o calendario.
De acordo co documento, recollido por Europa Press, a proposta da Xunta recolle que as vacacións de Nadal serán do venres 22 de decembro ao venres 5 de xaneiro, de forma que os alumnos se reincorporarían o luns 8. Ademais, as de Entroido serán do luns 12 ao mércores 14 de febreiro e a Semana Santa irá desde o luns 25 de marzo ao luns 1 de abril, que tampouco haberá clase.
Á parte destes períodos, a Xunta fixou o Día do Ensino para o xoves 7 de decembro, entre os festivos do mércores 6 e o venres 8. Ademais, os colexios e institutos terán liberdade para escoller un ou dous días no caso de que algún dos festivos locais caia en xornada non lectiva. Os centros deberán remitir as súas propostas á Administración autonómica antes do 20 de outubro.
CLASES ATÉ O 20 DE XUÑO
En canto ás avaliacións, a proposta de calendario escolar volve establecer que o alumnado --agás o de 2 de Bacharelato-- ten "o dereito e a obriga" de asistir ás clases até o 20 de xuño incluído.
Deste xeito, na mesma liña que este curso 2022/23 despois de que a Xunta acometese unha modificación do calendario a metade de ano, non se continuaría coa experiencia derivada da Lomloe que prevía unha terceira avaliación parcial nunha data diferente á final.
Neste contexto, e sempre coa obrigación de que haxa clase até o 20, o borrador remitido aos sindicatos dá liberdade aos centros para poder pór unha terceira avaliación parcial para ESO a partir do 13 de xuño e para 1 de Bacharel e de ciclos básicos a partir do 10.
No que respecta aos exames de recuperación, para 1 de ciclos básicos e de Bacharel, serán do 18 ao 20 de xuño, mentres que para 2 as datas estarán condicionadas ás da ABAU.
A partir do venres 21 de xuño de 2024, o corpo docente dedicarase a elaborar as actas de avaliación e outros documentos que correspondan, coa obrigación de permanecer nos centros até o día 28.
PERÍODO DE ADAPTACIÓN
De novo, en contraposición a postura dos sindicatos, a Xunta volve fixar un período de adaptación para 4 de Educación Infantil que garantirá "en todo caso" a "atención a tempo completo" dos nenos cuxas familias ou representantes legais así o soliciten.
De tal modo, os centros poderán optar por unha incorporación gradual do alumnado "que non se prolongará máis aló do día 15 de setembro de 2023". Iso si, terase en conta a escolarización previa dos nenos na etapa de 0 a 3 anos, a existencia de irmáns matriculados no mesmo centro, así como as necesidades familiares.
Andalucía
