Decenas de persoas protestan co BNG en Sanxenxo en contra da monarquía e a "corrupción institucionalizada"

   Néstor Rego asegura que Xoán Carlos I "non é benvido" e contesta a Rueda que "Galicia está no mapa desde hai moitos séculos"

   SANXENXO (PONTEVEDRA), 21 May. (EUROPA PRESS) -

   Varias decenas de persoas asistiron á concentración convocada polo BNG e a súa organización xuvenil, Galiza Nova, para o mediodía deste sábado en Sanxenxo (Pontevedra), coincidindo coa segunda xornada das regatas nas que participa o rei emérito Xoán Carlos I tras volver de Abu Dabi o xoves.

   Esta protesta, segundo explicou aos medios o deputado do Bloque no Congreso, Néstor Rego, trata de mostrar a oposición dos nacionalistas non só á presenza do ex xefe de Estado, senón tamén á monarquía do "réxime do 78" e a "corrupción institucionalizada" na Casa Real.

   "Un acto simbólico para deixar claro que desde o noso punto de vista o Borbón fuxido non é benvido en Galicia, porque representa todos os valores que rexeitamos", esgrimiu Rego, acompañado da vicepresidenta segunda do Parlamento galego, Montse Prado.

   Na protesta, convocada na Praza de Portugal de Sanxenxo, os participantes portaron bandeiras da España republicana e 'estreleiras', así como pancartas coas lemas 'Galiza non ten rei' e 'Galiza contra a monarquía española'.

   Os manifestantes corearon diversas consignas como "Os Borbóns, son uns ladróns!", "Rei Xoán Carlos, grazas por roubarnos!" e "Non estamos todos, falta Corinna!".

   Algúns viandantes paráronse xunto á protesta para contrarrestala con insultos e cánticos a favor do emérito: "Viva o rei e viva España!". Mesmo, algúns dos coches que pasaron pola estrada parábanse a tocar a bucina en sinal de desaprobación.

UNHA MONARQUÍA "DESIGNADA POR FRANCO"

   Segundo o deputado do BNG, a monarquía representa "un dos elementos máis antidemocráticos do réxime do 78", xa que a Xefatura do Estado "no canto de ser elixida o conxunto dos cidadáns é hereditaria, vitalicia e designada por Franco".

   "Queremos deixar claro que a nosa aposta é a favor da democracia, a favor dun modelo republicano (...) e dunha república galega democrática e soberana", engadiu Rego.

   Así mesmo, o deputado nacionalista dirixiuse ao presidente da Xunta, Alfonso Rueda, quen ao longo da semana asegurou que a visita de Don Juan Carlos "puña a Galicia no mapa". "Temos que dicirlle que Galicia está no mapa desde hai moitos séculos", replicoulle Néstor Rego, lembrando que "polo menos no ano 411 constituíuse o primeiro reino en territorio do Imperio Romano".

   "Non queremos que Galicia estea no mapa da corrupción institucionalizada, nin das mafias, nin de tramas de tráfico de armas nas que tamén parece que está involucrado o Borbón fuxido e hoxe retornado", incidiu.

COMPARECENCIA DE MARLASKA E BOLAÑOSS

   Neste contexto, Rego explicou que o BNG presentou no Congreso senllas peticións de comparecencia dos ministros do Interior, Fernando Grande-Malaska, e da Presidencia, Félix Bolaños, para coñecer "canto costa para o erario público" a visita do exmonarca. "Isto estamos ao pagar entre todos e non nos parece xusto e razoable", denunciou.

   Do mesmo xeito, a petición de comparecencia tamén ten o obxecto de saber a opinión do Goberno, "se lle parece ejemplificante que unha perosna que se fuxiu para evitar a acción da xustiza agora retorne e non pase aboslutamente nada".