Desaloxan un edificio en Ames por mor dun incendio nun garaxe que afectou a varios coches

SANTIAGO DE COMPOSTELA 26 Dic. (EUROPA PRESS) -

Un edificio situado en Bertamiráns, no municipio coruñés de Ames, tivo que ser desaloxado na mañá deste xoves a causa do intenso fume producido nun incendio orixinado no garaxe e que afectou a varios vehículos.

A chamada de aviso produciuse ao redor das 8,00 horas, informando dun incendio no garaxe dun edificio na Avenida da Mahía, en Bertamiráns. O edificio, de vivendas, ten no seu baixo un supermercado.

As chamas orixináronse nun dos vehículos estacionados no parking subterráneo privado do edificio, que comparte acceso co aparcadoiro do supermercado. A pesar de que se empregaron extintores para tratar de controlalo nun primeiro momento, segundo informou o 112, o lume estendeuse rapidamente a outros turismos e ao propio habitáculo.

Por iso, foron mobilizados até a zona efectivos de bombeiros do Parque Provincial de Boiro, así como GES de Brión, Garda Civil, Policía Local de Ames e Protección Civil de Ames e de Ortoño.

Dada a gran cantidade de fume xerada, foi necesario desaloxar por precaución tanto aos inquilinos das vivendas como aos traballadores do supermercado. Os labores de extinción prolongáronse até as 11,30 horas, e os efectivos continúan na zona ventilando. No entanto, As persoas desaloxadas xa comezaron a regresar ás súas vivendas.