Farjas di que a postura do Parlamento galego sobre o catálogo de medicamentos "reforza" a súa constitucionalidade

XUNTA/CONCHI PAZ

A CORUÑA 1 Abr. (EUROPA PRESS) -

A conselleira de Sanidade, Pilar Farjas, considerou que as alegacións remitidas polo Parlamento de Galicia ao Tribunal Constitucional, no que se pide o levantamento da suspensión do catálogo priorizado de fármacos, "reforza" a súa constitucionalidade e o seu "respecto escrupuloso" das competencias do Estado.

En declaracións a Europa Press, antes de clausurar o VIII Simposio do Grupo Español de Investigación en Cancro de Mama, celebrado no Pazo de Congresos e Exposicións de A Coruña (Palexco), Farjas subliñou que os servizos xurídicos do Parlamento galego participaron "en todo momento" no proceso de elaboración e aprobación da lei.

Así mesmo, sinalou que o informe xurídico presentado ante o Tribunal Constitucional "reforza a valoración da constitucionalidade da lei de racionalización do gasto farmacéutico de Galicia", ao tempo que incidiu tamén en que "reafirma" a petición de que o alto tribunal "se pronuncie e retire a suspensión", remarcou.

Farjas mostrouse confiada en que o Tribunal Constitucional falle a favor dos criterios defendidos pola Xunta de Galicia para poder seguir aplicando unha medida que cualificou de "importante" no actual contexto de crise económica "para garantir a alternativa máis eficiente na elección de medicamentos e potenciar o uso eficiente dos recursos da Sanidade", engadiu.