Formoso (PSdeG) contrapón o seu proxecto ao "identitario" do BNG e aos "figurantes políticos" do PP que "embarran"

O líder dos socialistas volve evitar pronunciarse sobre se se presentará á Alcaldía das Pontes: "Aínda hai marxe de tempo"

   SANTIAGO DE COMPOSTELA, 4 Feb. (EUROPA PRESS) -

   O secretario xeral do PSdeG, Valentín González Formoso, contrapuxo este sábado o proxecto político dos socialistas galegos co "proxecto político identitario" do BNG que, na súa opinión, "pretende pór un muro ao redor de Galicia", e co do PP que, asegurou, "pon figurantes políticos" que "fan ruído" e "embarran a vida política".

   En declaracións aos medios na sede do partido en Santiago despois de presidir a reunión da Ponencia Marco para as eleccións municipais de 2023, Formoso volveu marcar como obxectivo dos socialistas galegos "revalidar o éxito" dos anteriores comicios locais.

   Así, asegurou que palpa a "confianza que a cidadanía ten" no PSdeG, así como "a empatía" co seu partido e a "confianza como partido de goberno institucional".

   Neste sentido, defendeu que as cidades e pobos de Galicia "levan un selo que foi soñado polos socialistas". Un soño que, ao seu xuízo, supón que sexan o partido "dos grandes cambios que beneficiaron á sociedade galega e española".

   Por iso, este sábado os socialistas levaron a cabo a primeira reunión para elaborar a ponencia municipal que definirá "o que vai ser o PSdeG nas municipais".

    Nesta liña, Formoso manifestou que afrontan o proceso electoral "cargados de ilusión" e avanzou que será coordinado polo presidente da Fegamp e alcalde de Vilagarcía de Arousa, Alberto Varela, pola alcaldesa de Betanzos, María Barral, e polo delegado do Goberno en Galicia, José Miñones.

"DIFERENTE" OS SEUS "ADVERSARIOS"

   Neste contexto, o líder dos socialistas galegos asegurou que o PSdeG é unha forza política "diferente" aos seus "adversarios" políticos.

   Por unha banda, afirmou, atópase "unha forza de dereitas á que Galicia deu as costas permanentemente no ámbito municipal" e que, engadiu, "o que fai é pór a figurantes políticos que veñen facer ruído e a embarrar a vida política. "Ese é un mal camiño para facer avanzar á sociedade e aos pobos de Galicia", censurou.

   Doutra banda, en referencia ao BNG, sinalou que constrúe "un proxecto político identitario" que pretende "pór un muro ao redor de Galicia" e que "vai en contra da lóxica internacional e europeísta".

   "Non son tempos para confrontar cos socios europeos, non son tempos para renegar de Europa, non son tempos para renegar de España e non son tempos para illar Galicia; son tempos para coordinarse e crecer, para facernos fortes xuntos", proclamou.

   Do mesmo xeito, sostivo que os socialistas aspiran desde o ámbito municipal a "evitar que o PP desmantele o sistema sanitario galego" e tamén a "ser capaces de reter talento".

   "Imos ser capaces de ofertar un país mellor, máis dinámico, con máis forza e con moita máis moral, sobre todo para a nosa mocidade. Temos moita esperanza para este proceso. Van ser uns magníficos resultados e vainos a servir claramente de plataforma para ese ansiado soño que ten a sociedade galega dun cambio na Xunta o próximo ano", concluíu.

    Ademais, a preguntas dos medios sobre se xa decidiu se se presentará á Alcadía das Pontes, onde é rexedor desde o ano 2007, González Formoso reiterou que "aínda hai marxe de tempo" para tomar esa decisión que, en todo caso, "será comunicada pronto".