Galicia envía decenas de efectivos para axudar a afectados pola DANA, que xa están a retirar vehículos

SANTIAGO DE COMPOSTELA 4 Nov. (EUROPA PRESS) -

O presidente da Xunta, Alfonso Rueda, informou de que Galicia enviou decenas de efectivos ao Levante español para axudar aos afectados pola DANA, estando xa na zona moitos deles retirando vehículos.

Segundo indicou na rolda de prensa posterior ao Consello da Xunta, o Goberno galego encargouse de coordinar estas axudas, enviando non só medios autonómicos, senón tamén profesionais de administracións locais.

Rueda reivindicou que neste dispositivo interviñeron gobernos "de todas as cores políticas" e "non houbo ningún problema", porque "todas as administracións de Galicia están a remar a unha" para ofrecer os medios que se necesitan en Valencia.

En concreto, nunha primeira partida saíron esta pasada noite para Valencia 60 persoas do operativo de loita contra incendios de Galicia con seis motobombas, un bulldozer e un tractor; así como sete profesionais da Axencia Galega de Emerxencias e do Grupo de Apoio Loxístico á Intervención. Levaron consigo unha bomba de achique con capacidade para 30.000 litros, dúas nodrizas de 25.000 litros cada unha, un dron con cámara térmica e equipos de iluminación.

Ademais, tamén se desprazaron á zona seis axentes da Policía Autonómica e do Grupo Operativo de Actividades Subacuática cunha lancha neumática e un kaiak de salvamento, un dron subacuático e outros materiais para mergullar en augas contaminadas.

Cinco persoas do grupo de emerxencias supramunicipal de Mos (Pontevedra) e dous voluntarios de Protección Civil do Rosal completan o grupo, que xa está a traballar na zona retirando vehículos.

SEGUNDA EXPEDICIÓN

Pola súa banda, esta mañá saíu unha segunda expedición de efectivos desde Galicia formada fundamentalmente por profesionais do ámbito local, con máis de 90 persoas dotadas con bombas de achique e equipos de excarceración e limpeza.

Trátase de 41 voluntarios de Protección Civil de distintos puntos de Galicia, así como 36 bombeiros dos Concellos da Coruña, Santiago, Lugo e Ferrol e do Consorcio Provincial de Pontevedra. Tamén 14 membros dos grupos de emerxencia supramunicipais de Ponteareas, Celanova e Padrón.

Ademais, a Xunta informou de que se integraron ao operativo seis persoas de Protección Civil de Cambados e seis bombeiros de Vigo, superando así os 180 efectivos.