O titular de Sanidade evita falar de peche de centros sanitarios e xustifica unha "redistribución" de recursos
SANTIAGO DE COMPOSTELA, 2 Jul. (EUROPA PRESS) -
O conselleiro de Sanidade, Antonio Gómez Caamaño, asegurou este martes que a súa Consellería "non fabrica profesionais sanitarios" e que a "fábrica" de médicos está "no Ministerio", en resposta á situación denunciada por plataformas como SOS Sanidade Pública.
O titular de Sanidade, preguntado pola prensa sobre estas críticas, cualificou de "éxito" o funcionamento do plan de continxencia posto en marcha para paliar a falta de profesionais sanitarios este verán.
Neste sentido, Gómez Caamaño explicou que o Servizo Galego de Saúde (Sergas) se limita a "xestionar" os recursos que teñen e que prefire non falar de peche de centros de saúde, senón dunha "redistribución".
Previamente, representantes de sindicatos e a plataforma SOS Sanidade Pública denunciaban este mesmo martes en rolda de prensa o peche de consultorios e de 800 camas hospitalarias.
Nesta liña, Caamaño defendeu que as camas están "100% dispoñibles" e que se trata dunha cuestión de "operatividade". "Déixanse operativas as camas que se cren que son necesarias", remarcou este martes en declaracións ante a prensa antes da presentación da Memoria Anual 2023 do IDIS (Instituto de Investigación Sanitaria de Santiago de Compostela), no Hospital Clínico compostelán.
Precisamente desde a plataforma de SOS Sanidade afearon que se "normalizou" que todos os veráns falten médicos en Galicia. Preguntado respecto diso, Gómez Caaamaño asegurou que non leu o comunicado da asociación e que cando o faga contestará "o que sexa necesario".
"O que si lin é un informe da Federación de Asociacións en Defensa da Sanidade Pública que sitúan a Galicia en cuarta posición en taxa de médicos de atención primaria ponderado pola poboación", remarcou.
En referencia ás listas de espera e ao adiamento de operacións pola falta de persoal, o conselleiro insistiu en que o seu obxectivo é acurtar as listas o máximo posible e que esta escaseza fai que os os próximos meses sexan "complicados".
Así mesmo, respecto ao plan de continxencia estival, o conselleiro tamén foi preguntado por como van garantir a supervisión --que esixiu o Ministerio-- deses médicos MIR que se incorporan para cubrir vacantes. "Supervisaranos outros médicos, loxicamente", respondeu.
CERTIFICADO DE AENOR
Nun acto previo, o conselleiro recolleu o certificado co que Aenor acredita ao conxunto de servizos tecnolóxicos do Sergas co "nivel máis alto" de protección. Este recoñecemento acredita a "garantía e seguridade" de todos os seus servizos, unidades e centros de saúde.
Nesta liña, Caamaño destacou a importancia que ten "salvagardar a información e os datos dos pacientes galegos". Deste xeito, a sanidade pública galega se convertese na primeira de todo o territorio español en certificar este nivel de protección en todos os seus servizos tecnolóxicos.
Andalucía
