A taxa será "cero" para eléctricos e híbridos enchufables
NIGRÁN (PONTEVEDRA), 3 (EUROPA PRESS)
O imposto de transmisión de vehículos de segunda man, unha taxa autonómica que se paga nas operacións de compra de coches usados, baixará do 8 a 3 % a partir de 2024, e eliminarase para os vehículos de 'emisións cero' (eléctricos e híbridos enchufables).
Así o anunciou este martes o presidente da Xunta, Alfonso Rueda, durante unha visita a un concesionario de venda de coches en Nigrán, na que estivo acompañado polo conselleiro de Facenda e Administración Pública, Miguel Corgos.
Durante a súa intervención nesta visita, o presidente galego puxo en valor o apoio do seu goberno ao sector da automoción, desde a fabricación até as fases de mantemento ou venda de segunda man, e anunciou esta rebaixa fiscal como medida para xerar "movemento económico" e "estimular" a venda de vehículos usados, que o pasado ano sufriu "unha pequena diminución".
Segundo explicou, a partir de 2024, e así se reflectirá nos orzamentos galegos que entren en vigor a 1 de xaneiro, o imposto autonómico de transmisión de vehículos que se aplica nestas operacións pasará do 8 % (é o tipo que se impón agora á maioría de coches, fóra dos de 'emisións cero' que é menor) ao 3 %. Así mesmo, as operacións de vehículos eléctricos ou híbridos enchufables terán taxa "cero".
Esta rebaixa de case un 60 % neste imposto podería aplicarse nunhas 60.000 transaccións, segundo as estimacións do goberno galego, que calcula un impacto económico duns 5 millóns de euros.
Alfonso Rueda sinalou que "merece a pena deixar de facer esa recadación" para que se reactive este mercado e "a xente anímese" a adquirir vehículos de segunda man. Deste xeito, proclamou, "Galicia convértese na Comunidade Autónoma co imposto de transmisión de vehículos máis baixo".
OUTRAS MEDIDAS
A esta medida, lembrou, súmanse outras rebaixas fiscais xa aplicadas pola Xunta, como a rebaixa no tramo autonómico do IRPF, no imposto de sucesións, etc. "Os estímulos e rebaixas fiscais sempre son bos, é moito mellor baixar que subir impostos", proclamou o titular do Executivo galego.
Segundo os cálculos da Xunta, as rebaixas fiscais aplicadas permitirán aos galegos aforrarse máis de 1.200 millóns de euros nesta lexislatura. "Por aí temos que seguir (...), somos un goberno responsbale que fai ben as contas para ter un pulmón que permite tomar este tipo de decisións", valorou.
Andalucía
