Martiño Noriega levará as relacións políticas de Anova, que apela a iniciar o diálogo "á esquerda do PSOE"

   A formación escolle a súa nova Comisión Permanente, da que Beiras forma parte, co reto de "acabar" co Goberno de Feijóo en 2020

   TEO (A CORUÑA), 21 Dic. (EUROPA PRESS) -

   O exalcalde de Santiago Martiño Noriega é o novo responsable de relacións políticas de Anova-Irmandade Nacionalista, partido que este sábado designou a súa nova Comisión Permanente co obxectivo de iniciar "xa" o diálogo con forzas "á esquerda do PSOE" para "desputar a hexemonía" ao PPdeG nas eleccións autonómicas previstas, salvo adianto, para o outono do 2020.

   Así o explicou o recentemente reelixido portavoz nacional da formación, Antón Sánchez, quen compareceu no Hotel Congreso de Teo (A Coruña) xunto con Noriega e a concelleira de Marea de Vigo Oriana Méndez tras a elección por unanimidade da nova dirección. Neste órgano figuran eles tres xunto con, entre outros, o histórico nacionalista Xosé Manuel Beiras, que será responsable de relacións internacionais.

   En declaracións aos medios, o ex-rexedor e dirixente de Compostela Aberta avanzou que nese diálogo que estableza cos seus socios políticos Anova "ten o reto de ser leal á súa historia" de "interlocución que se poida dar no espazo da unidade popular e en todo o espazo á esquerda do Partido Socialista".

   "Por min non vai quedar e cónstame que vou testar as posibilidades de constituír hexemonías", garantiu Noriega, quen tamén se definiu como unha persoa "de diálogo e de intermediación".

   Pola súa banda, o portavoz nacional de Anova, Antón Sánchez, reiterou esa vontade de falar con forzas "á esquerda" do PSdeG-PSOE para afrontar o "gran reto" de en 2020 "acabar con ese Goberno altamente nocivo para o país" como é, segundo as súas palabras, o de Alberto Núñez Feijóo.