VILAGARCÍA DE AROUSA, 19 Jul. (EUROPA PRESS) -
O Atlantic Fest de Vilagarcía arrinca este venres cun cartel no que destacan Mika, Los Planetas, Crystal Fighters, Depedro, Sílvia Pérez Cruz, Sidonie ou Andrés Suárez, etre outros artistas.
Este venres comeza o festival na arousá praia da Concha coas actuacións de Carlos Ares, The Parrots, Alcalá Norte, Rocío Saiz, Gazella e Grande Osso, entre outros.
O sábado será a quenda da banda indie granadina Los Planetas, que celebra os 30 anos do seu disco debut, Super 8. Subirán a un dos escenarios tamén Crystal Fighters, Sílvia Pérez Cruz, Carlos Sadness, Derby Motoreta's Burrito Kachimba, Depedro, Cariño, Luís Fercán, Florent y Yo e Dani Dicostas.
Finalmente, o domingo será a quenda da enerxía do pop do libanés Mika, o potente directo dos barceloneses Sidonie e as composicións do cantautor ferrolán Andrés Suárez, así como de Elefantes, Las Dianas e Grande Osso, entre outros.
Á parte de música, haberá un espazo gastronómico onde os asistentes poderán gozar dos produtos de varios establecementos da zona. A zona de acampada atópase no Cámping Río Ulla e este ano incorporou unha zona glamping.
FONTE DE RIQUEZA
Na presentación da edición deste ano, o presidente da Deputación de Pontevedra, Luis López, expuxo que "eventos como o Atlantic Fest supoñen moito máis que tres días de concertos, son unha fonte de riqueza, emprego e crecemento económico para toda a comarca". Nesta liña, asegurou que os festivais "son un recurso de referencia para captar visitantes" e o Atlantic Fest "sitúa" ás Rías Baixas no mapa das "grandes producións musicais a nivel nacional".
A pasada edición, este festival conseguiu reunir a 30.000 asistentes, crear 300 postos de traballo de forma directa e involucrar a máis de 100 empresas, tanto na organización como na realización do festival.
Andalucía
