O naval de Vigo reactiva o proxecto da plataforma de reparacións coa vista posta nos fondos europeos

Estaleiros e auxiliares aspiran a captar contratos de reparación de buques pesqueiros ou de transporte

VIGO, 17 Nov. (EUROPA PRESS) -

Estaleiros e empresas auxiliares do naval da ría de Vigo reactivaron o proxecto da plataforma de reparacións, unha vella aspiración desta industria, coa vista posta nas oportunidades e novos nichos que ofrece o mercado, e nos fondos europeos de recuperación.

Así o trasladou a presidenta da asociación Vigo Ship Repair, Nuria Toca, que este mércores presentou esta iniciativa xunto ao xerente de Aclunaga, Óscar Gómez; ao presidente do Porto, Jesús Vázquez Almuíña; e ao presidente da Confederación de Empresarios de Pontevedra (CEP), Jorge Cebreiros; nun acto no que participaron tamén representantes das empresas do sector.

Segundo explicou Nuria Toca, esta plataforma aglutina a máis de 20 empresas (estaleiros, industria auxiliar, loxística, etc.), aínda que non é nova, xa que leva anos constituída como asociación. Así, após un intento inicial que non frutificou, a presidenta de Vigo Ship Repair afirmou que "agora é o momento" de facer un novo intento, nun contexto no que "o mercado vai repuntando".

Nese sentido, destacou que o sector naval vigués ten a capacidade para ofrecer servizos de reparación con valor engadido, aplicación de novas tecnoloxías e unha actividade máis sustentable. Así mesmo, apuntou que esta industria terá agora a oportunidade de "aproveitar" os fondos europeos de recuperación.

"Non é unha aposta en falso nin prematura, é meditada", subliñou, e lembrou que as empresas implicadas no proxecto teñen potencial para ofrecer servizos en toda a cadea de valor para reparar buques de pesca, de transporte, 'offshore', etc., tanto para o mercado nacional como internacional. Entre as empresas que forman parte do proxecto están Cardama, Freire, Metalships, Toysal, Emenasa, Chorro Naval, Ferri ou Vigra.

"ENORME POTENCIAL"

Pola súa banda, o xerente de Aclunaga, Óscar Gómez, referiuse ao "enorme potencial" do sector na área de reparación naval, e sinalou que xa hai plataformas similares en Canarias (especializada en reparación de 'offshore') e no sur da Península (para reparación de cruceiros), así como en Ferrol. "Pero xa teñen o seu nicho e non repercutiría no proxecto de Vigo, que busca outra especialización", recalcou.

Así mesmo, recalcou que a actividade de reparación naval (e do desmantelamento de barcos) está repuntando cada vez máis en Europa e que, actualmente, hai uns 115.000 buques navegando, gran parte deles cunha vida próxima aos 25 anos. De feito, a actividade de reparación naval en Galicia reportoulles ás empresas unha facturación de 300 millóns de euros anuais, e as "expectativas" de mellorar esa cifra "son boas".

Segundo puntualizou, 4 de cada 5 buques reparados pertencen a armadores estranxeiros (máis da metade europeos) e é nese mercado onde Vigo, que goza dunha situación xeográfica estratéxica no ámbito das rutas de transporte marítimo, debe pór o foco.

Óscar Gómez tamén recalcou que, á marxe das reparacións necesarias polos prazos de vida útil dos barcos, moitos buques deberán ser sometidos a modificacións e adaptacións para cumprir a normativa europea relativa a emisións ou depuración de augas de lastre, para o que deben pasar por instalacións de reparación, o que supón outra nova oportunidade para o sector naval.

En todo caso, o xerente de Aclunaga explicou que, aínda que os estaleiros da ría teñan as instalacións adecuadas para ofrecer ese servizo, debe traballarse para que haxa tamén unha contorna "propicia" para as industrias auxiliares. Así, explicou que debe haber en Vigo un peirao de reparacións que conte cos servizos necesarios, como guindastres, zonas delimitadas para traballar, áreas para manexar certos residuos, etc.

"COMPETIR EN CALIDADE, TEMPO DE ENTREGA E PREZO"

Mentres, o presidente da Autoridade Portuaria, Jesús Vázquez Almuíña, trasladou o seu apoio ao proxecto, e subliñou que, dada a dificultade de competir en prezos, Vigo debe facer valer a súa "calidade e prestixio" no ámbito da construción e reparación naval, á vez que recalcou a gran "vantaxe" que supón ter "profesionais moi capacitados".

Finalmente, Jorge Cebreiros (CEP) destacou que Vigo non só conta co tecido empresarial apropiado, senón tamén con centros de investigación e tecnolóxicos para responder a este reto. Segundo indicou, o sector debe aspirar a captar máis negocio "competindo en calidade, tempo de entrega e por que non? en prezo", e animou aos implicados a buscar colaboración das administracións e a sumarse a iniciativas para acceder a fondos de cooperación transfronteiriza.