O orzamento en Sanidade sobe case un 5%, mentres que Medio Ambiente ascende un 10% e Emprego permanece conxelado

Por provincias, Corgos destaca que se busca "contribuír ao equilibrio territorial", polo que Lugo e Ourense terán maior gasto per cápita

   SANTIAGO DE COMPOSTELA, 19 Oct. (EUROPA PRESS) -

   A Consellería de Sanidade aumenta un 4,9% o seu orzamento para o ano 2025, mentres que o departamento de Medio Ambiente contará coa maior subida porcentual, cunha alza do 10% respecto ao 2024, e as contas da Consellería de Emprego permanecerán conxeladas ao "volver a unha taxa financeira normal" por executar fondos europeos.

   Tal e como detallou este sábado en rolda de prensa no Parlamento o conselleiro de Facenda e Administración Pública, Miguel Corgos, tras entregar ao presidente da Cámara o proxecto de orzamento e a lei de medidas fiscais e administrativas que o acompañan, Emprego contaba con "moitos fondos do mecanismo de resiliencia" que xa executou e que, por tanto, "desaparecen", ademais de contar con "moito fondo social europeo".

    Por iso, tras ese "sobreinvestimento" en materia de fondos europeos, agora volve a "unha taxa financeira normal". En todo caso, Corgos destacou que Emprego "presenta a mesma contía" e o fondo propio da administración autonómica sobe.

   Así mesmo, o responsable de Facenda subliñou que tres de cada catro euros van destinados ás consellerías de Sanidade, Educación, Política Social e Emprego.

   "O gasto social por primeira vez supera os 10.000 millóns de euros", reivindicou antes de lembrar que "houbo presupostos nos que o orzamento total non chegaba a esa contía".

GASTO SOCIAL

   En concreto, a área que dirixe Antonio Gómez Caamaño contará con 5.457 millóns de euros -- 255 máis que en 2024--. Así, Corgos mencionou medidas como o Centro de Protonterapia, novos cribados para mellorar a prevención, "o mellor calendario de vacinación" ou o Plan de Infraestruturas Sanitarias, coa finalización do Hospital de Montecelo e o de Ferrol, así como obras noutros centros.

   En canto a Educación, o gasto ascende un 4,2%, o que supón un total de 3.041 millóns de euros para iniciativas como o primeiro curso con matriculas universitarias gratuítas, a diminución do cociente de alumnos por aula ou o financiamiento ás universidades.

   Mentres, Política Social incrementa un 8,3% o seu orzamento, que ascende até os 1.323 millóns. Neste caso, Corgos puxo en valor medidas como o "reforzo da asistencia en centros residenciais e na contorna familiar, o impulso da escolarización no primeiro ciclo de educación infantil e o aumento para o servizo de asistencia familiar para concellos.

OUTRAS CONSELLERÍAS

   Despois desas partidas, o conselleiro de Facenda explicou que os maiores incrementos reflíctense en Vivenda e Infraestruturas, que aumenta en 37,5 millóns o seu orzamento para 2025 até os 513.

   "A vivenda recibe un impulso orzamentario", reivindicou Corgos, que apuntou que se "triplica" o orzamento para chan residencial e construción de vivendas e cóntase cun programa de axuda para construción de vivendas en aluguer, rehabilitación de edificios para vivenda pública, desenvolver chan residencial e axudas para sufragar á mocidade os gastos asociados.

   Precisamente, sobre os mozos, Corgos lembrou que se reservará para eles até o 25% das vivendas en venda e até o 40% das vivendas en aluguer.

   En porcentaxe, a Consellería que máis sobe é a de Medio Ambiente e Cambio Climático, que contará o próximo exercicio cun 10,3% máis de orzamento ao recibir 186,6 millóns -- 17,4 máis--.

   Pola contra, as que reflicten un menor incremento porcentual son as de Medio Rural, Mar e Presidencia --ademais de Emprego (0%) e Facenda (0,8%)--, cunha alza do 3,3, 2,8 e 2,1% respectivamente.

   Ademais, a Consellería de Economía e Industria suma 25,8 millóns de euros máis que en 2024 (+7,4%), polo que supera os 374 millóns. Así mesmo, Cultura, Lingua e Xuventude contará para o próximo ano con 146,6 millóns, un 7,5% máis.

POR TERRITORIOS

   Doutra banda, o titular de Facenda debullou as contas por territorios. Así, sinalou que estes orzamentos buscan "contribuír ao equilibrio territorial" e as provincias con maior gasto por habitante serán as de Lugo (5.840 euros) e Ourense (5.742 euros). Unhas cifras "moi por encima das provincias atlánticas", apuntou Corgos, que detallou que A Coruña recibirá 4.449 euros per cápita e Pontevedra, 4.318.

   En cifras absolutas, as provincias que reciben maior volume de gasto son A Coruña e Pontevedra, con 4.999 millóns de euros e 4.077, respectivamente, mentres que a provincia de Lugo recibirá 1.892 millóns, e a de Ourense, 1.749.

   Preguntado sobre as diferenzas entre as provincias atlánticas, Corgos recoñeceu que hai "un efecto" que non son "capaces de depurar": a capitalidade.

   Neste sentido, o conselleiro argumentou que ao estar a sede da Xunta en Santiago, "moitos servizos públicos" atópanse na capital galega e "son moi difíciles de territorializar" e, por iso, "o peso do gasto na cidade de Santiago é moi importante", pero "moitos deses servizos non son servizos que benefician unicamente aos santiagueses, senón a todos os galegos".

    Por todo iso, relatou que aínda que tentan "depurar o efecto 'sede da Xunta' ano tras ano" entre as provincias atlánticas pode verse como "hai un peso maior da provincia da Coruña debido a este efecto". "Traballaremos nisto co ánimo de reflectir a realidade", aseverou.