SANTIAGO DE COMPOSTELA, 13 Abr. (EUROPA PRESS) -
Os dous detidos na protesta de bateeiros que se desenvolveu este xoves ante a sede a Xunta en San Caetano, en Santiago, saíron de comisaría após case oito horas e despois de declarar ante a policía.
Segundo informan fontes do sector consultadas por Europa Press, atribúenselles dous cargos: atentado contra a autoridade e altercados públicos. Pasarán a disposición xudicial nos próximos días.
A concentración, que segundo o delegado do Goberno non fora comunicada, produciuse desde as 8,00 horas fronte ao complexo administrativo do Goberno galego en San Caetano, e fontes da delegación aseguran que algúns dos participantes rubiron o valo para tentar acceder o edificio, ademais de incendiar colectores e arroxar pedras aos axentes, extremos que negan os manifestantes.
Pouco despois das 9,00 horas houbo unha carga policial, varias persoas resultaron feridas, tanto manifestantes como axentes, e foron detidos dous participantes na protesta.
Os bateeiros censuraron a actuación policial por "desproporcionada" e a próxima semana, o martes, volverán reunirse para analizar a situación, no medio dun conflito que se prolonga desde hai semanas e que se debe á escaseza de mexilla --a semente coa que cultivar o mexillón-- e enfróntalles a outro sector, o dos percebeiros.
Andalucía
