Os partidos políticos galegos expresan o seu pesar pola morte repentina do conselleiro de Facenda

SANTIAGO DE COMPOSTELA 6 Oct. (EUROPA PRESS) -

Os partidos políticos galegos expresaron o seu pesar e condolencias pola morte repentina do conselleiro de Facenda, Valeriano Martínez, cando se atopaba no seu despacho do edificio administrativo de San Caetano.

"Hoxe Galicia perde a un servidor público exemplar. Nós, a un dos nosos", sinala a familia popular nunha mensaxe na súa rede de twitter. Así, o PPdeG significou que Valeriano Martínez "deixa un importante legado político pero, sobre todo, un gran baleiro persoal".

"Todo o noso agarimo aos seus seres queridos e o noso respecto cara a un amigo que se ha ir traballando polos galegos", manifestou.

Tamén o BNG expresou o seu pésame polo deceso e trasladou as condolencias á súa familia e seres queridos, así como ao PP galego. "As miñas condolencias á familia e amizades de Valeriano Martínez, nun momento de conmoción e tristeza compartida. Un abrazo tamén á súa familia política, ao PP, que vive hoxe un día de loito", manifestou a portavoz nacional do Bloque, Ana Pontón, na súa conta persoal.

O secretario xeral do PSdeG, Gonzalo Caballero, mostrouse, tamén na súa conta de Twitter, "conmocionado e triste polo inesperado falecemento" do conselleiro. "O meu máis sentido pésame á súa familia, ao Goberno de Galicia e a todo o PP", expresou.