Pontón (BNG) propón acordar con Suíza a homologación automática dos títulos de FP

A líder do Bloque pechou este domingo en Zürich os seus encontros coa colectividade galega en Suíza, tras visitar Basilea e Xenebra

   SANTIAGO DE COMPOSTELA, 16 Abr. (EUROPA PRESS) -

   A portavoz nacional do BNG, Ana Pontón, pechou este domingo en Zürich os seus encontros en Suíza coa colectividade galega na emigración, nos que trasladou as propostas do Bloque para "unha nova xeración de emigrantes" chegados nos últimos anos. Entre elas, propuxo acordar con Suíza a homologación automática dos títulos de Formación Profesional, xa que, segundo destacou o BNG, existen "dificultades para homologar os títulos de FP", cun proceso que "pode tardar meses ou mesmos anos, provocando que sexan penalizados no mercado laboral suízo".

   "Coa crise chegou unha nova xeración de galegos e galegas con moita formación e preparación que está a ter dificultades para que esa formación sexa homologada e permítalle ter un salario acorde coa súa cualificación", sinalou Pontón.

   Esta problemática que indican os nacionalistas, non afecta os títulos universitarios que, tras o Plan Bolonia, "teñen un procedemento moi regulado", pero "si á formación profesional".

   "A consecuencia é grave, porque as empresas aproveitan para pagarlles menos salario coa escusa de que non homologaron o seu título a pesar de que realizan con toda eficacia o traballo", explicou.

   Por iso, avanzou que o BNG vai levar o asunto ao Parlamento, para propor á Xunta que negocie co Goberno suízo un convenio de colaboración que permita a homologación directa e automática dos títulos de FP".

OUTRAS PROPOSTAS

   Así mesmo, Pontón tamén recolleu outras demandas que lle trasladou a emigración, en concreto, a de fillos e fillas nacidos xa en Suíza e que queren manter a súa lingua, pero "apenas reciben formación no propio idioma e carecen por completo de contidos audiovisuais para os máis pequenos".

   Neste caso, a proposta do BNG é dobre: crear o Instituto Rosalía de Castro, similar ao Cervantes, e a emisión en Suíza da programación infantil e xuvenil da TVG.

   "A máis inmediata é que a TVG emita a través da súa canle internacional programación infantil e xuvenil en galego, non se entende que non o faga, deixando fóra aos nenos e nenas galegas que están en Suíza e noutros países de Europa", indicou Pontón.

   Sobre o Instituto Rosalía, o obxectivo é "difundir e promover" a lingua e a cultura no exterior. Ademais, permitiría ter acceso á cultura en galego, tanto en materia de literatura, de cinema, música, teatro ou cómic.

   "O BNG ten un proxecto para darlle oportunidades de futuro a xente do noso País, para que non haxa tantas familias separadas e para que cada vez que un galego ou unha galega saca un billete de tren ou de avión para irse sexa por vontade propia e non por necesidade, non porque Galicia non lle das oportunidades que merece", destacou.