Pontón defende que "do que o BNG dependa, a dereita e a extrema dereita non van gobernar no Estado"

   PONTEVEDRA, 22 Jun. (EUROPA PRESS) -

   A portavoz nacional do BNG, Ana Pontón, defendeu que "do que dependa" da formación frontista após as eleccións do 23 de xullo "a dereita e a extrema dereita non van gobernar no Estado español".

   A líder nacionalista participou este xoves na presentación da candidatura do Bloque ás Cortes pola provincia de Pontevedra, que está encabezada para o Congreso por Carme da Silva.

   "Temos unha liña moi clara de que non queremos un goberno que signifique retrocesos nos dereitos e nas liberdades públicas", incidiu Pontón, que tamén advertiu da posibilidade de que se produzan "retrocesos nos dereitos das mulleres ou recortes nas pensións".

   Ana Pontón insistiu en que "esa posición está moi clara" e así llo lembrarán á cidadanía durante a campaña electoral cando expliquen "para que vai servir o seu voto".

   A portavoz do Bloque apuntou que é coñecido "o que representa o Partido Popular", lembrando que xa gobernou no Estado e cun presidente galego como foi Mariano Rajoy "que o único que trouxo a Galicia foi discriminación" e citou o incremento das peaxes na autoestrada, a "hipoteca" para a ría de Pontevedra coa prórroga da concesión de Ence ou que "recortaron pensións e dereitos sociais".

    "É evidente que nós non podemos apoiar esas políticas", sentenciou, antes de remarcar que "canta máis forza teña o BNG, máis terá Galicia".

   "Necesitamos un grupo galego forte da man do BNG para que condicionemos a política do Estado a favor dos galegos e as galegas", aseverou a líder nacionalista, que recalcou que "os temas da axenda galega teñen que aparecer con forza no Congreso".

   "O 23 de xullo xogámonos moito, unha parte do noso futuro. Só o BNG é garantía de defensa dos intereses de Galicia", recalcou Pontón. "Nós o que pedimos non son privilexios, nós o que pedimos é xustiza e un trato digno para Galicia", apostilou.

CARME DA SILVA

   Sobre Carme da Silva, a portavoz nacional do BNG destacou a súa "capacidade política honradez e entrega". A concelleira pontevedresa forma parte da Executiva nacional do BNG e acaba de dirixir a campaña das eleccións municipais en toda Galicia e ademais ten na súa traxectoria a experiencia de ser parte central do goberno municipal de Pontevedra.