Pontón volve reclamar un Debate do Estado da Autonomía que o PP non contempla: "O regulamento é moi claro"

   Puy lembra que en anos con investidura non se celebra o DEA que pide Pontón, que acusa a Rueda de "trucar" o debate ao seu favor

   SANTIAGO DE COMPOSTELA, 20 Sep. (EUROPA PRESS) -

   A portavoz nacional do BNG, Ana Pontón, volveu a reclamar a celebración dun Debate do Estado da Autonomía que permita aos grupos da oposición gozar de maior marxe para cuestionar ao presidente da Xunta, Alfonso Rueda, e expor as súas propostas ante a "urxencia" da actual crise económica.

   A petición, expresada por Pontón hai unha semana durante a sesión de control do primeiro pleno do curso político e que retomou este martes, foi levada polo Grupo Parlamentario do BNG á xunta de portavoces que configurou a orde do día da próxima sesión plenaria da Cámara autonómica, na que comparecerá Rueda para avanzar as principais liñas dos orzamentos da Xunta para 2023.

   Alí, a proposición da formación frontista topouse coa postura do Partido Popular. "O regulamento é moi claro", sinalou o portavoz do grupo maioritario, Pedro Puy, que lembrou que as normas de funcionamento do Lexislativo marcan que en anos nos que se celebraron investiduras non levan a cabo debates de política xeral.

   Após atribuír a "un erro" que Pontón verbalizase a proposta no último pleno e lembrar que Rueda foi investido no mes de maio, Puy tachou de "curioso" que o BNG expuxese esta cuestión na xunta de portavoces onde pediron, como recoñeceu a viceportavoz do Bloque, Olalla Rodil, que o regulamento sexa "reinterpretado" para facilitar a celebración deste debate, algo que ven justificado polo "grave" contexto económico ao que se enfronta Galicia.

   Mentres se reunía a xunta de portavoces en Santiago, a líder nacionalista, Ana Pontón, visitou as instalacións dunha adega de Vilanova de Arousa (Pontevedra), onde volveu a subliñar que é preciso un debate máis amplo na Cámara para que os grupos poidan "debater en profundidade sobre o que está a pasar nesta crise".

   E é que, para Pontón, Rueda "truca" o debate parlamentario ao acudir á Cámara para comparecer por vía ordinaria, co que contará con tempo ilimitado "mentres a líder da oposición só vai ter 15 minutos para poder aborar os graves poblemas que ten Galicia e sen a opción a presentar propostas"

   "Reclamamos que se celebre ese debate de política xeral onde podamos formular propostas e alternativas para darlle solucións a unha cidadanía que está a vivir momentos moi difíciles, cunha crise de prezos que non só afoga ás familias senón que estamos ante unha crise que tamén afoga aos sectores produtivos", aseverou.