Paula Prado critica que Ana Pontón acuda á investidura da nova presidenta de México: "Falta ao respecto a todos os galegos"
SANTIAGO DE COMPOSTELA, 28 Sep. (EUROPA PRESS) -
A secretaria xeral do PPdeG, Paula Prado, pediu ao BNG e ao PSdeG que "rectifiquen" e se poñan "ao lado da democracia" en Venezuela e non "ao lado da ditadura".
Así o manifestou este sábado en declaracións aos medios na Praza do Obradoiro, en Santiago de Compostela, onde, acompañada polo coordinador de Acción Exterior, Rubén del Río, e do edil compostelán Adrián Vila, tamén instou a nacionalistas e socialistas a que "chamen ao que pasa en Venezuela polo seu nome": "Unha ditadura, a ditadura do señor Maduro".
Neste contexto, Prado sinalou que ambas formacións "deberían rectificar" e situarse "á beira das miles de persoas que tiveron que marcharse de Venezuela", así como "dos máis de 30.000 galegos" que residen no país e que "están a vivir na situación de vulneración de dereitos e liberdades aos que os someteu a ditadura de Maduro".
Nesta liña, lembrou que os populares estarán este sábado ás 20.00 horas participando na 'Gran protesta mundial pola liberdade de Venezuela'. "Imos estar á beira do pobo venezolano nesa marcha mundial e tamén para pedir que Edmundo González sexa recoñecido presidente lexítimo de Venezuela", aseverou.
PONTÓN EN MÉXICO
Doutra banda, Paula Prado criticou que a portavoz nacional do BNG, Ana Pontón, viaxe a México para acudir á investidura da nova presidenta, Claudia Sheinbaum. "Decidiu viaxar a México e faltarlle ao respecto a todos os galegos e aos españois", manifestou, a pesar, engadiu, "da inxustificada non invitación ao rei de España".
Pola contra, reivindicou que o PPdeG está "á beira das institucións, do estado de dereito e do xefe de Estado", mentres que o BNG "está con ideas extremas", con partidos como "Sumar, Podemos, Bildu ou ERC, que unha vez máis deciden estar en contra de España".
Así mesmo, reprochou ao PSdeG, "socio do BNG en moitas institucións", que non lle pediu a Pontón "que rectifique e pida perdón aos españois por esta inxustificada aldraxe".
Andalucía
