Prado (PPdeG) defende a unidade do partido en Ourense: "Ninguén do PP se vai ir nin vai facer ningunha cousa rara"

   Recrimina a "inacción" de PSOE e BNG na capital ourensá e insiste en que o PP quixo "desde o primeiro momento" ter un goberno con eles

   SANTIAGO DE COMPOSTELA, 30 Jun. (EUROPA PRESS) -

   A secretaria xeral do PPdeG, Paula Prado, defendeu este venres que o partido na provincia de Ourense está unido "entorno ás siglas do Partido Popular". "Ninguén do PP se vai ir nin vai facer ningunha cousa rara", insistiu.

   A preguntas dos medios antes de dar un paseo pola Praza de Abastos de Santiago acompañada da candidata do PP ao Congreso Rosa Quintana, Prado asegurou que se Manuel Baltar decide, "como ten decidido, dar un paso á beira", os compañeiros do PP ourensán terán "a suficiente responsabilidade".

   Así, afirmou que todos os que forman parte do PP "asumen" que a unidade é a "gran forza" do partido, xa que, na súa opinión, iso é o que os cidadáns "sempre valoraron no Partido Popular" e por iso son "a forza máis votada".

   "Por iso, os cidadáns sempre confían no PP, porque é un sinal de identidade do partido e, nese sentido, estou moi tranquila porque sei que en Ourense a unidade sempre imperou e vai seguir imperando", resolveu.

   O pasado 14 de xuño, a tres días da constitución dos concellos, Baltar anunciaba que daba un paso á beira e non aspiraría a continuar na Deputación de Ourense. Ao día seguinte, Rueda desvelaba que, nunha conversación co 'barón' ourensán, trasladáralle que no próximo congreso provincial do PP tampouco tentaría revalidar o seu liderado orgánico: "Iso trasladoume el".

   Con todo, o pasado domingo, día 25, Manuel Baltar ofrecía unha entrevista ao diario 'La Región' na que advertía que "non" se marcha e deixaba a porta aberta a volver presentarse a presidir o partido na provincia, unha decisión que tomaría e daría a coñecer el mesmo.

CONCELLO DE OURENSE

   Así mesmo, cuestionada sobre o pacto con Gonzalo Pérez Jácome no Concello de Ourense, Prado insistiu en que os populares "desde o primeiro momento" manifestaron a súa intención de ter "un goberno co PSOE e o BNG".

   Nesta liña, relatou que o candidato popular, Manuel Cabezas, trasladou esta intención aos candidatos do PSOE e do BNG, aos que convocou a "unha reunión a tres bandas para falar dese pacto" e á que os partidos "se negaron".

   "Unha semana despois", continuou, Cabezas "trasladou unha proposta de repartición de competencias e concellarías" e solicitando "o apoio para a forza máis votada". "Tampouco foi escoitada e a resposta foi o silencio", lamentou.

   Por último, o venres pola noite, engadiu, os populares trasladaron "a última opción" que pasaba "incluso" por darlle a alcaldía ao PSOE. Unha posibilidade "real" que, segundo asegurou Paula Prado, "era certa" e non era "un farol nin unha mentira", xa que o PP apoiou outras alcaldías do PSOE como as de Barcelona ou Vitoria.

   Neste contexto, ante a "inacción e a falta de resposta" de nacionalistas e socialistas, "loxicamente" o PP optou polo que fai "sempre": "Que goberne a lista máis votada". Así, na cidade de Ourense goberna a lista máis votada e, "loxicamente", reiterou, os populares terán apoio na Deputación de Ourense para que tamén "goberne a lista máis votada".