Prado (PPdeG) ve prioritario "organizar equipos" para as próximas locais e afasta a opción dun congreso autonómico

   Asegura que o partido "suma altas sobre todo nas cidades" e avanza que haberá un acto a mediados de mes para conmemorar a vitoria de Rueda

   Xustifica o apoio do PP ao novo decreto ómnibus de Sánchez, aínda que, "até onde" ela sabe, Rueda "non" pediu a Feijóo cambiar de postura

   SANTIAGO DE COMPOSTELA, 1 Feb. (EUROPA PRESS) -

   Un ano despois do arranque da campaña das eleccións nas que, con Alfonso Rueda como candidato, o PPdeG revalidou a súa maioría absoluta, a secretaria xeral do partido en Galicia, Paula Prado, ve ao partido coa maquinaria engrasada e, tras afastar a posibilidade dun congreso autonómico, fixa como "prioridade" orgánica "organizar equipos" para a próxima cita coas urnas: as municipais de 2027.

    Nunha entrevista concedida a Europa Press, o número dous do PPdeG precisou que, aínda que non implique pechar xa a todos os candidatos das urbes, si que considera que "este é o ano" para "organizar equipos" e impulsar conclaves pendentes. "Para o PPdeG é moi importante que a xente vexa un partido unido e estable. Canto antes teñamos definidos os equipos, máis fácil é enviar esa mensaxe", reflexionou.

    Precisamente, co congreso local de Vigo xa convocado e con Luisa Sánchez como única candidata por agora, destacou dela que parte "coa vantaxe" de que "concita o consenso de todo o partido" na cidade, pero tamén lle puxo deberes: "facer equipo, ensanchar o partido e sumar a persoas da sociedade civil".

    Confía, así mesmo, en que os últimos cambios efectuados en Ourense sirvan para "mellorar" a situación do partido, aínda sen unha cabeza de cartel visible. Mentres, en Santiago, avala a Borja Verea como candidato do PPdeG en 2027. "Para min, Borja Verea é o alcalde de Santiago nas próximas eleccións, sen ningunha dúbida", defendeu.

   Nel e no seu "proxecto de cidade" confía a compostelá para apartar da Alcaldía á nacionalista Goretti Sanmartín, coa que ve, dixo, como a capital de Galicia é cada vez unha cidade "máis sucia, escura e deprimida". Todo iso, cun PSOE "en descomposición".

O CONGRESO AUTONÓMICO "NON É UNHA PRIORIDADE"

   Con independencia da situación específica do partido nas distintas localidades, o que ten claro Paula Prado é que celebrar un congreso autonómico --Alberto Núñez Feijóo adoitaba convocalo case de inmediato após cada cita electoral para revalidar o seu liderado-- non corre présa.

    "Houbo un extraordinario para a elección de Rueda (cando Feijóo deu o salto á política estatal) hai dous anos e medio, e os congresos adoitan ser cada catro anos. Poderiamos telo agora mesmo, non habería ningún problema, pero agora non é unha prioridade", sentenciou. Pola súa banda, vese cómoda como secretaria xeral, confesa que o partido "lle encanta" e ve "colmadas" as súas aspiracións políticas

    Ao tempo, avanzou que o PPdeG prepara un acto a mediados deste mes de febreiro para conmemorar a primeira vitoria de Rueda como candidato autonómico e reivindicar a súa acción de goberno. Os detalles e protagonistas, ademais do propio presidente autonómico, están por pechar.

UN PARTIDO QUE "SUMA ALTAS"

   Desde unha perspectiva global, está "satisfeita" coa situación dun partido que, sostén, rolda "os 100.000 afiliados" e que "suma altas sobre todo nas cidades", e tamén xente "nova", fronte a unhas baixas que se producen "normalmente por falecemento ou por traslado de domicilio".

    "Nas cidades vemos como se incrementa o proceso de afiliación e simpatía cara ao partido. Tamén estamos a chegar a familias de entre 30 e 45 anos que ven que o PPdeG está a pór en marcha políticas que os benefician", dixo.

   Como exemplo, destaca a aposta de Rueda por buscar proxectos industriais, pasos para favorecer a conciliación ou servizos sociais --como a gratuidade das escolas infantís ou das primeiras matrículas universitarias--, e o impulso de medidas de vivenda. Precisamente, considera que o seu principal acerto é "estar en contacto cos problemas da xente". Sobre o seu principal erro, contesta, entre sorrisos: "Se o houbo, eu non o vin".

    Máis crítica mostrouse co papel da oposición, cun PSdeG "en declive" que "pon o partido e a Pedro Sánchez por encima de Galicia", e un BNG "negacionista da industria --reiterou que o seu rexeitamento a Altri é "unha vinganza política"-- e do futuro de Galicia". "O seu único modelo é que non goberne o PPdeG", reprobou.

RELACIÓN CON SANTALICES E POLÍTICA LINGÜÍSTICA

   Na súa conversación con Europa Press, Prado tamén restou importancia aos seus 'choques' co presidente do Parlamento, Miguel Santalices, que enmarcou no "fragor" do debate. "Fixo e fai un magnífico traballo. Coa súa retranca e a súa forma de presidir conseguiu reconducir moitos debates", recoñeceu.

    Despois de xustificar algunha decisión de Santalices como un intento de "mostrar a súa imparcialidade", resolveu que, o que os coñece a ambos, sabe que non hai problema: "el encaixa e eu encaixo". Seguirá no futuro no seu cargo? "Está a facer un bo traballo esta lexislatura. Despois haberá que gañar outras eleccións", dixo, remisa a "pór o carro diante dos bois".

    A número dous do PPdeG tamén limitou o impacto da marcha de Daniel Chapela con duras críticas á política lingüística da Xunta. Subliñou que no partido hai "unha trintena de coordinadores" de área e defendeu a súa vertente "galeguista".

    Preguntada sobre se é intocable o decreto do idioma no ensino, evitou anticipar que concluirán os equipos que traballan en busca dun novo gran pacto polo galego, pero defendeu que esta norma "está a funcionar" e non só para garantir as "competencias" en galego, senón tamén en inglés.

DECRETO ÓMNIBUS E GOBERNO CENTRAL

   Parca en palabras ao ser preguntada sobre se ela dimitiría de estar na situación do senador Manuel Baltar, condenado por conducir a máis de 200 km/h, limitouse a responder que "terá que cumprir coa multa como calquera cidadán" e defendeu que os estatutos do partido "non contemplan" que deba renunciar.

    Prado tamén defendeu que o PP vaia a apoiar o novo decreto ómnibus pactado polo Goberno que dirixe Pedro Sánchez con Junts --aínda que inclúa medidas moi criticadas días antes polos populares como a cesión dun palacete en París ao PNV--. Como argumento, sinalou que é Sánchez quen se "arrodilla ante Puigdemont" e o "trocea".

    "E o PP agora, ante un cambio de opinión, ante un cambio no decreto, apóiao. A política de altura, a política útil é tomar decisións que benefician aos cidadáns. E estamos a falar de millóns de pensionistas que van a valorizar as súas pensións ou de millóns de cidadáns afectados polo transporte", explicou.

    En todo caso, sobre se houbo contactos con Feijóo por parte de Rueda ou do PPdeG para cominarlle a meditar a súa postura dado o impacto en Galicia, por exemplo, no ámbito das pensións, a 'dúas' do partido respondeu: "Até onde eu sei, non".

    Finalmente, acerca de se Sánchez, a quen atiza verbalmente en case todas as súas intervencións, fixo algo que vexa bo para Galicia nos últimos anos, concluíu que, "se fixo algo positivo", foi na campaña que arrincou un ano atrás, "vir moito e presentarse como aval dun suposto goberno alternativo ao PP", de PSdeG e BNG. "Agradecémosllo moito. Non véu nunca máis", subliñou.

   Del opina que "resistirá" na Moncloa a pesar dos "casos de corrupción que salpican á súa contorna". Vería "extraordinario" sumar votos para unha moción de censura que o apartase do Goberno central, pero rexeita o seu impulso "se non se dan as circunstancias". Na súa opinión, sería "un trámite" tan "innecesario" como politicamente inútil.