O PSdeG critica que Feijóo use a figura de senador por designación autonómica para "manexar a maquinaria" do PP

   SANTIAGO DE COMPOSTELA, 9 May. (EUROPA PRESS) -

   O portavoz parlamentario do PSdeG, Luis Álvarez, criticou que o líder do PP, Alberto Núñez Feijóo, e o vicesecretario de Organización Territorial, Miguel Tellado, vaian ocupar o cargo de senador por designación autonómica para "manexar a maquinaria" do Partido Popular a nivel estatal en lugar de para "defender os intereses" de Galicia.

   Nunha rolda de prensa ofrecida este luns xunto á deputada Begoña Rodríguez Rumbo e despois de que coñecerse que Feijóo e Tellado pasarán a ocupar estas responsabilidades despois das renuncias dos até agora senadores Juan Serrano e Elena Muñoz e previa aprobación no Parlamento de Galicia, Luís Álvarez lembrou que a figura do senador por designación autonómica debe "denfender da mellor maneira posible" os intereses daquelas comunidades ás que representan.

   "Non é o caso da designación destes dous novos senadores, designación que o único obxectivo que pretende é, desvirtuando aquilo para o que foron concibidas estas figuras, resolver un problema de representatividade", apuntou.

   "Non descubro a pólvora se digo que a presenza de Núñez Feijóo no Senado non obedece á defensa dos intereses de Galicia, que é do que vai estar alí, débese a que teñen que encaixar pezas. Vai estar alí porque ten que manexar a maquinaria do PP estatal", incidiu.

   Así, preguntouse por como actuará Feijóo cando haxa "intereses atopados" entre distintas comunidades en cuestións como o financiamento autonómico ou o naval. "É evidente que se trata dun emprego partidista porque ou os senadores (que renuncian) estaban a facer un traballo manifestamente mellorable ou se trata de encaixar a Feijóo e a Tellado en Madrid", apuntou.