O PSdeG lembra ao deputado Martín Seco que "ninguén está por riba das normas do partido"

O partido remitiu un expediente sancionador a Ferraz, pero Seco apunta que actuou "con lealdade e en liña co mandato"

   SANTIAGO DE COMPOSTELA, 19 (EUROPA PRESS)

   O secretario de Organización do PSdeG, José Manuel Lage, aplaudiu este sábado o labor e implicación do portavoz parlamentario do partido, Luís Álvarez, á vez que lembrou, en alusión ao caso do deputado Martín Seco, que "ninguén está por riba das normas do partido".

   Aínda que recoñeceu que desde a dirección non é habitual entrar a valorar cuestións desta índole, Lage respondeu así a preguntas dos xornalistas despois de que este venres se coñecese que o PSdeG remitiu a Ferraz o expediente sancionador que solicita a suspensión de militancia e a expulsión do Grupo Parlamentario de Martín Seco.

   En resposta aos medios, José Manuel Lage lembrou que "ninguén está por riba das normas do partido" e pediu "respecto á militancia" que escolleu á dirección. "O partido ten unhas normas e uns procesos e todos temos que respectar a decisión da militancia, a vontade da militancia, cando escolle a unha dirección", destacou.

   A continuación, dixo que o PSdeG ten "un gran portavoz parlamentario", Luís Álvarez, que "xestiona adecuadamente as políticas no ámbito parlamentario aplicando a liña política que decide a dirección". "Por tanto, temos máxima confianza nel e na xestión que está a facer do grupo", engadiu.

EXPEDIENTE

   Os feitos que aduce o PSdeG no expediente remitido a Ferraz teñen a súa orixe no pasado mes de setembro, cando Martín Seco foi o encargado de defender a postura do Grupo Socialista durante o debate da Lei de áreas empresariais elaborada pola Xunta. O deputado, que criticou na súa intervención o contido da norma, avanzou ao finalizar que o seu grupo votaría a favor da lei porque así o ordenou "a dirección política do partido".

   Esta frase foi entendida pola dirección do partido como un "claro xesto de desafío" a González Formoso, polo que, agora, piden que se lle aparte do grupo e se lle suspenda de militancia, o que carrexaría tamén que abandone as súas responabilidades á fronte do PSOE de Arteixo.

   Fontes próximas á cúpula dos socialistas galegos defenden que a directriz de votar a favor da lei da Xunta foi adoptada tras a rolda de contactos de Formoso con "distintos axentes económicos sociais" que manifestaron o seu desexo de que a normativa saíse adiante ante a preocupación de que a falta de chan industrial en Galicia provocase a "fuga" de investimentos cara a Portugal.

   Esta postura, que segundo estas mesmas fontes foi mesmo abordada nun encontro entre o líder socialista e o vicepresidente primeiro, Francisco Conde; foi trasladada ao grupo, polo que Seco recibiu indicacións de defender desde a tribuna a lei.

   A dirección galega recalca que a súa vontade é actuar con "total contundencia" e "non pasar unha máis" ante unha persona á que ven "máis fóra que dentro" da organización pola súa actitude, que atribúe a que o grupo de afíns a Caballero "non aceptaron os resultados" das primarias de 2021. "Non se vai a consentir que ninguén fomente a división interna nin que se menoscabe a imaxe do partido nos medios ou nas redes sociais", remarcan.

   Pola súa banda, Martín Seco defendeu xa este venres que o seu comportamento como membro do partido e dentro do grupo parlamentario foi "intachable" xa que, lembra, naquela ocasión el mesmo e todo o grupo votaron "o que indicou a dirección do PSdeG", polo que non ve que o seu proceder causase un "menoscabo á imaxe do partido", xa que actuou "con lealdade e en liña co mandato" da cúpula da organización.