O PSdeG pedirá a comparecencia da "man dereita de Rueda" na Xunta pola adxudicación de contratos ao seu irmán

   Besteiro considera "absolutamente preocupante" o suposto trato de favor para beneficiar a un familiar "desde 24 departamentos distintos"

   SANTIAGO DE COMPOSTELA, 14 Oct. (EUROPA PRESS) -

   O xefe de filas do PSdeG, José Ramón Gómez Besteiro, anunciou que os socialistas galegos pedirán a comparecencia da secretaria xeral de Presidencia, Beatriz Cuiña, na comisión parlamentaria que investigará as adxudicacións da Xunta polos contratos asinados co seu irmán.

   Así o avanzou este luns durante unha visita aos traballadores da CRTVG concentrados ante a sede en San Marcos en protesta pola externalización de programas e o control político do ente.

   Na súa intervención, Besteiro esixiu explicacións a Rueda e ao seu "número dous" no Goberno galego após coñecerse que, segundo publica este luns 'eldiario.es' durante o últimos sete anos un total de 24 departamentos da Xunta asinaron 272 contratos menores, sen concurso público, coa empresa do irmán de Beatriz Cuíña, algo que o socialista cualificou de "absolutamente preocupante".

   O secretario xeral do PSdeG considerou necesario coñecer "toda a verdade" por unha "práctica xeneralizada do PP" no goberno para "beneficiar a familiares de cargos" na Xunta.

   Así mesmo, anunciou que os socialistas incluirán a comparecencia desta responsable política no marco do plan de traballo da comisión de investigación que inicia os seus traballos para fiscalizar a contratación do Goberno galego.

   Este órgano terá este martes unha primeira reunión para aprobar as súas normas de funcionamento, á que os socialistas chegan cun "novo foco de alarma" polo abuso da contratación "a dedo" esta vez para beneficiar a un familiar directo.

   Así, sinalou que "non se trata de calquera cargo", xa que Cuíña é unha persona que ostenta unha posición de "máxima confianza de Rueda", e avisou que, "en función de como evolucións este novo caso", a súa formación non descarta pedir máis comparecencias.

   Ademais, preguntado ao repecto, advertiu que, despois de "coñecer a verdade" nesta comisión de investigación, o caso pode derivar na "vía xudicial".