O PSOE de Santiago acusa á alcaldesa de "sectarismo" e pídelle rectificar e ir á Ofrenda ao Apóstolo

Valorará "moi seriamente" se acudir á 'Alba de Compostela' no caso de que Goretti Sanmartín non o mova para outra data

SANTIAGO DE COMPOSTELA, 11 Jul. (EUROPA PRESS) -

O PSOE de Santiago acusa á alcaldesa, Goretti Sanmartín (BNG), de "sectarismo" e ínstalle a "rectificar" na súa intención de non acudir á Ofrenda ao Apóstolo o 25 de xullo, á vez que lle pide que convoque outro día a 'Alba de Compostela', o acto institucional que ten previsto realizar no Pazo de Raxoi.

En rolda de prensa, o portavoz municipal socialista, Gonzalo Muiños, advertiu de que o "plantón" anunciado pola rexedora nacionalista é algo que o seu grupo considera "bastante grave".

"Volvemos a tempos de Martiño Noriega en que a alcaldesa non asume que está a representar a todos os veciños. Non é nada menor", subliñou.

Neste sentido, trouxo a colación outro "gran referente do BNG de Santiago como foi Encarna Otero", quen "si actuou de alcaldesa accidental en 2001 cando era tenente de alcalde porque Sánchez Bugallo tiña que exercer de delegado rexio".

Agora, agregou, "parece que Goretti --Sanmartín-- non está disposta a asumir esa responsabilidade que implica ese cargo de alcaldesa e para iso recorre a distintas escusas contraprogramando o acto institucional máis importante tanto a nivel local, galego, nacional, que conta con máis de catro séculos de historia".

Neste sentido, criticou que "o fai involucrando a persoas todas elas merecedoras de todas as homenaxes posibles". "É lamentable que as persoas, institucións merecedoras deste recoñecemento sexan utilizadas", incidiu.

Nesta liña, a portavoz da xestora, Marta Álvarez Santullano, fixo fincapé en que Sanmartín "debe ser alcaldesa de todos os composteláns" e pediulle "que se aparte do sectarismo", posto que ese "non é o camiño adecuado".

"A alcaldesa ten hoxe unha oportunidade, para ser alcaldesa de todos. Para pór en práctica o que tanto predica: o consenso", apostilou.

O PSOE quere un Santiago "no que caiban todos" e unha Compostela "sen discriminación algunha", afirmou. Por iso esixiulle "amplitude de miras e que aplique consenso e diálogo para que todos caiban nese acto civil que ela quere facer".

Pola súa banda, o secretario xeral, Bernardo Fernandez, interpretou que "o que hai de fondo nesta manobra política (...) é unha cuestión de sectarismo", e afeou esta "mala forma de empezar" como alcaldesa, ao "non respectar as tradicións, que van máis aló do relixioso" e incumben ao cultural.

"Lamentamos que para xustificarse organice un evento para contraprogramar e pondo nunha situación moi incómoda ás persoas que poidan recibir ese recoñecemento", coincidiu Fernández.

Así mesmo, apuntou que está "convencido" de que "por desgraza" este acto "non vai ser o único" deste tipo por parte da nova alcaldesa.

Así, chamou ao Bloque e á rexedora a "rectificar", acudir á Ofrenda "e cambiar de data a homenaxe", posto que, de non ser así, "o punto de mira informativo non vai estar só en que non acuda, senón que vai estar diluído no outro acto, arroupada por veciños de Santiago que van ser homenaxeados". "Hai unha contraprogramación desde o punto de vista informativo", considerou.

Pola súa banda, Gonzalo Muiños censurou que, con isto, Sanmartín "está a saltarse á toureira os acordos por unanimidade na xunta de portavoces".

A súa representación na 'Alba de Compostela' é "algo" que o PSOE vai "valorar" con reunións de grupo e estudará "moi seriamente", pero de momento manda esta "mensaxe" de que ten "364 días para facer un acto onde se dea valor a todas as entidades".

"GRAN MINORÍA"

Por outra banda, e a preguntas dos xornalistas, Gonzalo Muíños opinou que son "unha gran minoría" os "malos hábitos" dos visitantes á capital galega.

En calquera caso, medidas dirixidas a mellorar eses hábitos "están ben porque van saír beneficiados todos, sobre todo os cidadáns de Santiago que non queren ese tipo de comportamentos".