Reforzar a defensa do galego, entre as prioridades do BNG após non prestar a "atención continuada que merece"

   Entre outras medidas, aposta por políticas de inmersión lingüística, ser propositivo a nivel lexislativo e apoiar as iniciativas populares

   SANTIAGO DE COMPOSTELA, 21 Nov. (EUROPA PRESS) -

   O informe político e de xestión elaborado polo Consello Nacional do BNG con motivo da XVIII Asemblea Nacional ve necesaria a "acción social" e o "compromiso" co idioma galego ao considerar que a reivindicación de normalización de usos non contou por parte da formación co "necesario tensionamiento e atención continuada que merece".

   Así o apunta no documento ao que tivo acceso Europa Press e que será debatido na cita orgánica, un texto no que fai referencia aos datos feitos públicos polo Instituto Nacional de Estatística (IGE), que sinalan que o uso do galego está en mínimos históricos, o que para o Consello Nacional do BNG debuxa unha "situación de emerxencia lingüística extrema". "Reverter esta situación é posible, pero fai falta acción social e compromiso político", sinala o documento.

   A situación do idioma galego tamén é un dos asuntos que a formación que lidera Ana Pontón tamén aborda na súa tese política de cara á XVIII Asemblea Nacional. Así, neste outro texto que tamén será abordado polo máximo órgano de decisión do BNG sitúa a súa defensa como unha das prioridades da súa acción política e, nun apartado específico sobre o galego e os sinais de identidade nacional, subliña que debe ser clave "robustecer e intensificar aínda máis o compromiso activo" co galego na súa acción social, política e institucional.

"O PP, PRINCIPAL AXENTE CONTRA O GALEGO"

   "O BNG debe traballar pola súa plena normalización en todos os ámbitos, sen caer en rutinas e procurando a eficacia social das mensaxes, campañas e iniciativas a desenvolver", sinala o documento, que considera "urxente e prioritaria" o labor en defensa do galego nun contexto no que "as políticas de límites ao galego, reforzadas polo PP, intensifican os resultados negativos".

   Neste sentido, sostén que o PP mostrou a súa vontade de empregar os recursos públicos nunha xestión antigallega e chea de prexuízos cara ao idioma propio de Galicia e apunta que, "comunicativamente, o BNG debe incidir en que o PP é neste momento o principal axente contra o galego".

   Un axente que "está situado, desde a propia Xunta de Galicia, nunha posición agresiva e contraria á que desexa a maioría da sociedade galega: a defensa da lingua propia do país e o avance cara á súa normalización", engade o texto.

INICIATIVAS COMO A INMERSIÓN LINGÜÍSTICA

   Ante este contexto, o BNG di que debe impulsar un discurso baseado no orgullo de ter unha lingua propia e na autoestima colectiva que esta xera, así como na identificación da defensa do galego como unha causa xusta e necesaria para a cohesión social e o desenvolvemento político, económico e cultural de Galicia como nación.

   Para estes obxectivos, ve urxente e prioritaria a defensa, socialización e posta en marcha desde todos os ámbitos institucionais e sociais posibles de espazos e iniciativas de inmersión lingüística.

   Ademais, no plano social e político, apela a apoiar todas as iniciativas populares que pelexen por revitalizar o idioma e cre que debe de ser propositivo a nivel lexislativo, levando adiante proxectos como unha nova lei de normalización lingüística, a actualización e cumprimento do plan xeral de normalización ou a aposta dun novo decreto para o ámbito educativo que derrogue o de 2010.

TRES ÁMBITOS DE ACCIÓN PRIORITARIOS

   O BNG refírese á defensa do galego en varios puntos da súa tese política e, precisamente, sitúaa como un do tres ámbitos do social nos que debe reforzar o seu traballo.

   Así, o documento sinala que "é de máxima relevancia a implicación de toda a militancia do BNG na defensa dos dereitos lingüísticos e na dinámica normalizadora, actuando en todos os campos como axentes activos, coidando a calidade da lingua nos seus usos e avanzando na restauración dos nomes e apelidos propios.

   O segundo ámbito que ve necesario reforzar é o "simbólico" ao considerar que o "españolismo leva tempo desenvolvendo unha intensa estratexia de expansión e naturalización dos seus símbolos" fronte á que é "fundamental" desenvolver unha "estratexia propia que profunde na identificación da sociedade" galega cos seus símbolos nacionais.

   Por último, sitúa á mocidade como outro ámbito ou prioritario como "grupo social vital para o presente e o futuro do nacionalismo" e con Galiza Nova como "referencia".