Rexeitada na Deputación de Pontevedra unha moción do PSOE que pedía responsabilidades por excluír Vigo do Mundial

   PONTEVEDRA, 16 Abr. (EUROPA PRESS) -

   A Deputación de Pontevedra celebrou este mércores un pleno extraordinario, solicitado polo grupo provincial do Partido Socialista, para debater unha moción que esixía responsabilidades pola exclusión de Vigo como sede do Mundial de Fútbol 2030.

   A sesión plenaria durou 30 minutos e nela o Partido Popular fixo valer a súa maioría absoluta na Corporación para rexeitar a moción iniciativa. Previamente, os populares presentaran unha emenda de substitución --que foi rexeitada-- porque entendían que "a moción do PSOE é destrutiva, non construtiva".

   Segundo explicou o deputado socialista Gorka Gómez, a solicitude do pleno extraordinario respondeu á "cacicada perpetrada polo PP no pleno de marzo", segundo a cal se "vetou a posibilidade de debater unha moción urxente sobre a vergoñosa exclusión de Vigo".

   Na súa moción deste mércores, os socialistas instaban á administración provincial a esixir a restitución do estadio de Balaídos como sede e a que reclame explicacións ao presidente da Real Federación Española de Fútbol (RFEF), Rafael Louzán, que foi presidente desta mesma Deputación de Pontevedra co PP.

   Así mesmo, a moción demandaba á Deputación que esixise ao presidente da Xunta, Alfonso Rueda, que demandase as puntuacións de todas as cidades candidatas.

   Nesta iniciativa, o grupo do PSdeG tamén solicitaba que a Deputación de Pontevedra reclamase a dimisión do conselleiro de Presidencia, Xustiza e Deportes, Diego Calvo, como "cómplice deste atropelo", e pedía que se reprobasen "as lamentables declaracións da presidenta do PP de Vigo" e vicepresidenta do goberno provincial, Luisa Sánchez.

   Segundo manifestou Gorka Gómez, "o partido popular dedicouse a atacar a candidatura de Vigo e converteuse no principal defensor dun destacado militante do seu partido, o señor Louzán".

   A vicepresidenta Luisa Sánchez censurou a moción presentada polo Partido Socialista porque "só busca atacar á Xunta, á RFEF e a min", mentres que "a candidatura de Vigo lles preocupa cero".

   Pola súa banda, a portavoz do grupo do BNG, María Manuela Rodríguez Pumar, criticou a "falta de elegancia" do PP no último pleno da Deputación por negarse a debater en primeiro lugar a moción presentada polos socialistas sobre Balaídos e igualmente reprochou ao PSdeG forzar a convocatoria desta sesión plenaria extraordinaria para ter o seu "minuto de gloria" e cobrarse un "desquite" xerando un "gasto totalmente innecesario" ás arcas públicas.

   Rodríguez Pumar xustificou a abstención da formación nacionalista lembrando que este tema xa foi debatido no pleno municipal de Vigo e valorou como "penoso" que teña lugar esta "guerra partidista", que "máis que aclarar as presuntas irregularidades" só provoca "ruído" por "intereses de parte".